विराटनगर : विराटनगर अध्यागमन कार्यालय खुलेको छ । हाललाई जिल्ला प्रशासन कार्यालय मोरङमै कार्यालय रहने गरी अध्यागमन कार्यालय खुलेको हो ।
गृह मन्त्रालय अन्तरगतको अध्यागमन विभागले जिल्ला प्रशासन कार्यालय मोरङका प्रशासकीय अधिकृत गोकुल केसीलाई अध्यागमन कार्यालयको प्रमुखमा खटाएको हो ।
केसीले माघ ६ गतेदेखि नै कार्यालय संचालन गरिएको जानकारी दिए । विभागले विराटनगरमा रहने कार्यालयका लागि आठ जनाको दरबन्दी तोकेपनि हाललाई आफुसहित प्रशासन कार्यालयकै सुब्बा नारायण पौडेललाई काजमा खटाएको उनले बताए ।
अध्यागमनका लागि सीमावर्ती जोगबनीमा समेत कार्यालय खुलेपछि तोकिए बमोजिम भिसा(प्रवेशाज्ञा) नविकरण सहितका काम अघि बढाउन सहज हुने उनले जानकारी दिए । हाललाई नेपालबाट बाहिरिने विदेशीले प्रस्थानका लागि भिसा प्राप्त गर्न सक्ने कार्यालयका प्रमुख केसीले बताए ।, यो समाचार आजको उद्घोष दैनिकमा छापिएको छ ।
