एजेन्सी, फाल्गुन २०
मेस्सीले रियललाई हराएपछि आफूहरूको मनोबल बढेको पनि बताए । स्पेनिस बार्सिलोनाका कप्तान लिओनल मेस्सीले बार्सिलोनाले यो सिजन तीनवटै ठूला उपाधि जित्न सक्ने बताएका छन् । अघिल्लो दिन ला लिगाअन्तर्गत भएको सिजनको दोस्रो इएल क्लासिकोमा रियल मड्रिडलाई उसकै घरेलु मैदानमा हराएपछि मिडियालाई प्रतिक्रिया दिँदै मेस्सीले यस्तो दाबी गरेका हुन् ।
गत राति भएको खेलमा बार्सिलोनाले रियललाई उसकै घरमा ०–१ ले निराश बनायो । सो खेलपछि बार्सिलोनाले रियलसँग लिगमा समान खेलपछि १२ अंकको स्पष्ट अग्रता बनाएको छ । खेलपछि मिडियासँग बोल्दै मेस्सीले रियललाई हराएपछि उपाधि होडमा आफूहरूलाई एक चुनौती घटेको बताए । ‘हामी यो खेल जितेर उपाधि होडमा चुनौती कम गर्न चाहन्थ्यौं,’ मेस्सीले भने, ‘हामीले खेल जित्यौं । तर, ३ अंक जोड्यौं ।’
‘रियल मड्रिडजस्तो बलियो टिमलाई ब्याक टु ब्याक हराउनु सामान्य कुरा होइन । यो जितले हामी थप बलियो भएका छौं,’ मेस्सीले थपे ।
मेस्सीले यो सिजन आफूहरू तीनवटै ठूला उपाधि जित्ने अभियानमा रहेको र रियलमाथिको लगातारको जितले थप ऊर्जा मिलेको बताए । ‘यो खेलको जितले थुप्रै कुरामा अर्थ राख्छ,’ मेस्सीले भने, ‘यो जितले ठूला उपाधि जित्ने हाम्रो योजनामा बल पुगेको छ ।’
