विराटनगर, पुस २६
सरकारका प्रवक्ता एवं सूचना तथा सञ्चारमन्त्री मोहनबहादुर बस्नेतले आगामी वैशाख २४ गतेदेखि गोरखापत्रको विराटनगरसंस्कण प्रकाशित हुने जानकारी दिएका छन् । उनले त्यसका लागि सम्पूर्ण तयारी गर्न निर्देशन दिएका हछन् ।
नेपालको पत्रकारिताको विकासमा लामो इतिहास भएको गोरखापत्रको विकासका लागि सरकारले जस्तोसुकै योगदान गर्न तयार रहेको बताउँदै मन्त्री बस्नेतले संस्थानले आफ्ना काममा प्रभावकारी ल्याउनु जरुरी रहेको बताए ।
मन्त्री बस्नेतले गोरखापत्र संस्थानको विराटनगरस्थित निर्माणाधीन भवनको निरीक्षण गर्नुका साथै समाचारदाताहरूको प्रशिक्षण कार्यक्रमलाई समेत सम्बोधन गरेका थिए ।
बजारमा प्रतिष्पर्धा गर्न र क्षेत्रीय प्रकाशनमा जान स्रोत साधनको अभावभन्दा पनि व्यवस्थापकीय कमजोरी प्रमुख कारण रहेको भन्दै उनले व्यवस्थापन सुधार गरेर देशभरि विद्यमान समाचारदाताहरूको संयुक्त शक्तिमार्फत पत्रिकाको ख्याति बढाउनुपर्ने बताए ।
