विराटनगर,फागुन २६
सत्तारुढ दल नेकपा मोरङका नेता योगेन्द्र गुरुङले एक महिलाको हत्या गरेर शव सप्तकोसी नदीमा फ्यालिदिएको खुलेको छ ।मोरङको बेलबारी नगरपालिका–४ की २६ वर्षीय रमिला राई फागुन १७ गते शुक्रबार रातिदेखि हराइरहेकी थिइन् ।
राईको हत्या गरेर शव गायव बनाउन कोसी व्यारेजको पुलबाट नदीमा फ्यालेको प्रहरीको प्रारम्भिक अनुसन्धानबाट खुलेको छ । हत्यामा संलग्न एमाले बेलबारीका पूर्व अध्यक्ष समेत रहेका गुरुङ तीन दिन अघि इलामबाट पक्राउ परेका छन् । गुरुङलाई ईलाका प्रहरी कार्यलय बेलबारीको टोलीले ईलामबाट पक्राउ गरेको हो ।
गुरुङले दिएको बयानका आधारमा दुईदिनदेखि लगातार प्रहरीले कोसी नदी आसपासमा खोजतलासलाई व्यापक बनाए पनि शव भने फेला पार्न नसकिएको मोरङ प्रहरी प्रमुख एसपी मनोजकुमार केसीले बताए । उनले शव खोजी भईरहेको बताएका छन् । नदीले बगाइसकेका कारण पनि शव नभेटिएको हुन सक्ने उनले बताए । केसीले घटनाबारे थप अनुसन्धान भईरहेको बताए । उनले भने ‘घटनामा अरु प्रमाण पनि जुट्नु पर्छ । सबै प्रमाण संकलन गरेर घटनासँग जोड्दै अनुसन्धान गर्ने काम भइरहेको छ ।’
महिला हराएको केही दिनमै गुरुङ समेत बेलबारी छाडेर बेपत्ता बनेपछि प्रहरीले उनीमाथि अनुसन्धान केन्द्रीत गरेको थियो । त्यसै क्रममा भागेर इलाम पुगेका बेला गुरुङलाई पक्राउ गरिएको प्रहरीले जनाएको छ । प्रहरीले गुरुङले प्रयोग गर्दै आएको बा १५ प ७९१६ नम्बरको कार भने घरैबाट नियन्त्रणमा लिएको छ । हत्यापछि यही गाडीमा शव राखेर नदीसम्म पुर्याएको प्रहरी दावी छ ।
बेपत्ता भएकै राति हत्या गरेर शव गायव बनाउन कोसी नदीमा फ्यालिएको प्रहरी अनुसन्धानबाट खुलेको छ । महिला हराएको राति दुवै जना सँगै रहेको र महिला घर नफर्किएपछि परिवारले खोजीका लागि प्रहरीलाई गुहारेका थिए ।युवती हराएपछि गुरुङले ईलाका प्रहरी कार्यलय बेलबारीका प्रहरी निरिक्षक रामकुमार राईलाई फोन गरी तनाव भयो,गर्लफ्रेण्ड हराई भन्दै फोन गरेको र अनुसन्धानको क्रममा उनलाई केन्द्रित गरी प्रहरीले उनीमाथि अनुसन्धान थालेको थियो ।
हत्या गरिएकी महिला आफ्ना पहिलेका श्रीमानसँग सम्बन्ध विच्छेद गरेर माइतीमै बस्दै आएको खुलेको छ । उनकी एक छोरी छन् । गुरुङका भने श्रीमती र दुई छोराहरु काठमाडौंमा बस्दै आएका छन् ।नेकपा नेता गुरुङ एमाले बेलबारीका पूर्व अध्यक्ष हुन् भने नोबेल अस्पताल बेलबारी एवं एक साझेदारी वनका अध्यक्ष पनि हुन् ।
