विराटनगर, चैत १७
प्रधानमन्त्री केपी शर्मा ओलीले काठमाडौमा दुई दिनसम्म चलेर शनिबार सम्पन्न भएको लगानी सम्मेलन आफैमा परिपुर्ण सफलताको सम्मेलन भएको बताएका छन् ।
उनले सम्मेलनबाट विश्वबैंक सहित विभिन्न बिदेशी राष्ट्रहरुबाट लगानीको प्रतिबद्धता आएको बिषय प्रष्ट रहेको बताए । विराटनगर विमानस्थलमा सञ्चारकर्मीसंग कुराकानी गदै उनले मुलुक विकासको गतिमा अघि बढेको हेर्न नचाहनेहरुले अर्नगल प्रचार गरिरहेको पनि दाबी गरे ।
मुलुक सकारात्मक गतिका साथ विकासको बाटोमा अघि बढेको बताउदै प्रधानमन्त्री ओलीले गएको बर्षलाई सरकारले आधारबर्ष मानेको र आधार बर्षमा समेत ८ प्रतिशतको बृद्धि दर हुनु सकारात्मक रहेको बताए ।
उनले लगानी सम्मेलनसम्म आइपुग्दासम्मको समयलाई सरकारले आधार बर्षकोरुपमा लिएको बताउदै अब बिकासबर्ष सुरु हुने बताए । यो अवधिमा सरकारले कानुन संरचना र लगानीको आधार तयार पार्न खर्चिएको उनले प्रष्ट पारे ।
प्रधानमन्त्री ओलीले विपल्व माओबादी कतै दर्ता भएको बैधानिक पार्टी नरहेको बताउदै सो पार्टीको आराजक गतिविधिमाथि प्रतिबन्ध लगाइएको बताए ।
त्यसलाई पार्टी माथि लगाइएको प्रतिबन्धकोरुपमा लिन नहुने उनको भनाइ थियो । विप्लव नेकपाका कार्यकर्ता रिहा भएको प्रसंगतर्फ लक्षित गर्दे प्रधानमन्त्रीले अदालतमा कुनै पनि प्रकारको हस्तक्षेप नरहेको र अदालतले कानुन सम्वत नियमित आफना काम गर्दे आएको बताए । प्रधानमन्त्री ओली मोरङ र झापाका विभिन्न कार्यक्रममा सहभागी हुन आइतबार विराटनगर आएका हुन् ।
