विराटनगर,चैत २४
प्रदेश नम्बर १ सामाजिक विकास मन्त्रालयले आफू मातहतका सम्पूर्ण कार्यालय हाताभित्र आगामी वैशाख १ गतेदेखि सूर्तिजन्य पदार्थ सेवनमा पूर्णरुपमा रोक लगाएको छ ।
विश्व स्वास्थ्य दिवसको अवसरमा मन्त्रालय हाताभित्र सूर्तिजन्य पदार्थ सेवनलाई पूर्ण निषेध घोषणा गरेको मन्त्रालयले नयाँ वर्ष ०७६ वैशाख १ गतेदेखि भने सम्पूर्ण मातहतका कार्यालयमा सूर्तिजन्य वस्तु लिएर जाने जो कोहीलाई रोक लगाउने निर्णय गरेको हो ।
सूर्तिजन्य पदार्थ (नियन्त्रण र नियमन गर्ने) ऐन २०६८ को प्रभावकारी कार्यान्वयन गर्ने उद्देश्यले विद्यालय, स्वास्थ्य संस्था लगायतका तोकिएका स्थानहरुमा सूर्तिजन्य पदार्थ निषेध गर्न प्रदेश १ मा छुट्टै कानून निर्माण गर्ने सामाजिक विकास मन्त्रालयका प्रवक्ता गोपी घिमिरेले बताए ।
कार्यक्रममा सामाजिक विकास मन्त्री जीवन घिमिरेले मन्त्रालय हाताभित्र सूर्तिजन्य पदार्थहरु चुरोट, बिडी, सिगार, तमाखु, खैनी, गुट्खा, सूर्ति वा यस्तै प्रकारका अन्य सूर्तिजन्य पदार्थ मन्त्रालयभित्र ल्याए र प्रयोग गरेको पाइए कानून अनुसार कारबाही गर्ने बताए ।
