विराटनगर, माघ ५
१ नम्बर प्रदेशको अस्थायी राजधानी विराटनगर तोकिएसँगै प्रदेश प्रमुखको कार्यालय र निवास राख्न भवन खोजी कार्य सुरु भएको छ ।
अन्य प्रदेश प्रमुखहरु सँगै प्रदेश १ का नवनियुक्त प्रदेशप्रमुख गाविन्द सुब्बाले पनि शुक्रबार अपराहन्न राष्ट्रपति विद्यादेवी भण्डारी समक्ष समक्ष सपथ लिनेछन् ।
सुब्बाले सपथ लिए लगतै कार्यालय संञ्चालन गर्न कर्मचारी आउनेछन् । प्रदेश प्रमुखको कार्यालय क्षेत्रीय पशु निर्देशनालयमा राखिने तयारी गरिएको छ । प्रदेश प्रमुखको आवास पनि त्यही कार्यालयमा बनाइने भएको छ ।
मोरङका सहायक प्रमुख जिल्ला अधिकारी शेषनारायण पौडेलका अनुसार तत्कालका लागि प्रदेश प्रमुखको कार्यालय र निवास क्षेत्रिय पशु निर्देशनालय हुनेछ ।
प्रदेश प्रमुखको कार्यालय र निवास क्षेत्रिय पशु निर्देशनालयमा राख्ने तयारी गरिएपनि प्रदेशसभा वैठक कहाँ बस्ने अझै तय भएको छैन । जिल्ला समन्यवय समितिको कार्यालय वा वीरेन्द्र सभागृहमध्ये एक कार्यालयलाई पदेशसभा बैठक स्थल बनाइने पौडेलले जानकारी दिएका छन् ।
प्रदेश सभा सदस्य र विराटनगर महानगरपालिकाको समन्वयमा यो तय हुने गरिनेछ । सहरी विकास मन्त्रालयको टोलीले यसअघि विराटनगरमा उपलब्ध विभिन्न १२ वटा सरकारी कार्यालयमा मुख्यमन्त्रीको कार्यालय, अन्य मन्त्रालय र मन्त्रीहरुको आवास राख्न सकिने सिफारिस गरेको थियो ।
विराटनगरमा रहेका कार्यालयहरु मर्मतका लागि २१ करोड लाग्ने अध्ययन टोलीको अनुमान छ । अध्ययन समितिले क्षेत्रीय कृषि निर्देशनालयलाई मुख्यमन्त्रीको कार्यालय र निवास बनाउन तथा विरेन्द्रसभा गृहलाई प्रदेशसभा बैठक हलको रुपमा प्रयोग गर्न सिफारिस गरेको छ ।
