एजेन्सी, जेठ २
अर्जेन्टिनाका कप्तान लियोनल मेस्सीले ब्राजिलमा आयोजना हुने कोपा अमेरिका फुटबल खेल्ने भएका छन् । अर्जेन्टिनाले मेस्सीलाई समावेश गर्दै कोपा अमेरिका खेल्ने ३१ सदस्यीय प्रारम्भिक टोलीको घोषणा गरेको छ ।
अर्जेन्टिनाले घोषणा गरेको प्रारम्भिक टोलीमा परेसंगै मेस्सीले कोपा अमेरिका खेल्ने पक्का भएको हो । प्रारम्भिक टोलीमा मेस्सीसंगै अर्जियो अग्युरो, पाउल डिबाला जस्ता खेलाडी अटाएका छन् ।
अर्जेन्टिनाले कोपा अमेरिकाका लागि मे ३० मा राष्ट्रिय टोलीको घोषणा गर्नेछ । अर्जेन्टिनालाई कोपा अमेरिकाको उपाधि दिलाउन असफल हुँदै आएपछि मेस्सीले यस संस्करण नखेल्ने अनुमान गरिएको थियो ।
अघिल्लो संस्करणमा पनि अर्जेन्टिना उपविजेता बनेको थियो । अमेरिकामा सम्पन्न प्रतियोगिताको फाइनलमा अर्जेन्टिना चिलीसंग टाइब्रेकरमा पराजित भएको थियो । उक्त फाइनलमा मेस्सीले पेनाल्टीमा गोल गर्न चुकेका थिए । लगत्तै मेस्सीले अन्तराष्ट्रिय फुटबलबाट सन्यासको घोषणा गरेका थिए । तर, मेस्सीले सन्यास फिर्ता लिँदै अर्जेन्टिनाबाट रुस विश्वकप खेलेका थिए । ब्राजिलको पाँच शहरमा हुने कोपा अमेरिका जुन १४ बाट सुरु हुनेछ ।
