मोरङ व्यापार संघको ३२ औं कार्यकारिणी समितिमा पदभन्दा बढी संख्यामा उम्मेदवारी परेपछि शुक्रबार मतदान हुदैछ । बुधबार उम्मेदवारी फिर्ता लिने अन्तिम समयसम्म उद्योगतर्फ ८ सदस्य पदका लागि ११ र वाणिज्यतर्फ ८ पदका लागि १० जनाको उम्मेदवारी कायम भएपछि मतदान भएको हो ।
निर्वाचन अधिकृत पुनमकुमार गुप्ताका अनुशार उम्मेदवारी दिएकामध्ये प्रकाश मुन्दडा, सुनील टिवडेवाल, पवन राठी र पीयूष तोदीले नाम फिर्ता लिएका छन् । उनीहरूले वाणिज्यतर्फ उम्मेदवारी फिर्ता लिएका हुन् । उद्योगतर्फ भने पीयूषबाहेक उनीहरूको उम्मेदवारी कायमै रहेको निर्वाचन अधिकृत गुप्ताले बताए । वाणिज्यतर्फ उम्मेदवारी कायमै राख्दै उद्योगतर्फबाट नवीन रिजालले नाम फिर्ता लिएका छन् । उद्योगतर्फमात्रै उम्मेदवारी दिएका केशवकुमार गोयलले पनि नाम फिर्ता लिएका छन् ।मोरङ व्यापार संघको ३२ औं कार्यकारिणी समितिको १८ पदका लागि २९ जनाले सोमबार उम्मेवारी दर्ता गरेका थिए । वाणिज्यतर्फको ८ पदका लागि १४ जना, उद्योगतर्फ ८ पदका लागि १३ जनाले उम्मेदवारी दर्ता गरेका हुन् । त्यसमध्ये वाणिज्यतर्फ ४ जना र उद्योगतर्फ २ जनाले उम्मेदवारी फिर्ता लिएका हुन् । वाणिज्यतर्फ अनिलकुमार साह, अरविन्दकुमार शर्मा, सुनिलकुमार बिड्ला, मनीषकुमार मारु, राजेशकुमार अग्रवाल, विकाशकुमार वेगवानी, देवाशीष गोल्छा, विनित सिंघानिया, सुशील सुराना र नवीन रिजालको उम्मेवारी कायम भएको छ ।
उद्योगतर्फ मेघराज सिग्देल, सुकुमार सेन, धीरजराज पोखरेल, प्रकाश मुन्दडा, अमित सारडा, दीपेश सुवेदी, आशीष जाजू, पवन राठी, अनुपम राठी, सुनिल टिवडेवाल र अनिल सारडाको उम्मेदवारी कायम भएको छ । वस्तुगततर्फका २ पद भने यसअघि नै निर्विरोध भएका छन् । निर्विरोध हुनेमा सञ्जयकुमार श्रेष्ठ र सन्तनु रेग्मी छन् । उद्योगतर्फ उम्मेदवारी दिएका मेघराज सिग्देल, सुकुमार सेन र धीरजराज पोखरेलले ३१ औं कार्यकारिणी समितिको निर्वाचनताका वर्तमान नेतृत्वसँग पराजीत भएको राजेन्द्र राउतको समूहबाट उम्मेदवारी दिएको बुझिएको छ । सोही समूहबाट वाणिज्यतर्फ अरविन्दकुमार शर्मा र सुनिलकुमार विड्लाले पनि उम्मेदवारी दिएका छन् ।
मोरङ व्यापार संघको ३२ औं कार्यकारिणी समितिका लागि वाणिज्यतर्फ ३ सय ९४, उद्योगतर्फ २ सय ९६ र वस्तुगततर्फ ४ गरी ६ सय ९६ फर्म तथा व्यक्ति मतदाता रहेको निर्वाचन अधिकृत पुनमकुमार गुप्ताले जानकारी दिए । संघले दिएको परिचयपत्रका आधारमा मतदान गर्न दिइने गुप्ताले बताए । शुक्रबार रातिसम्म परिणाम सार्वजनिक हुने निर्वाचन समितिले जनाएको छ ।
