१४ असार, झापा ।
झापाको हल्दिवारीमा जङ्गली छावा हात्तीको करेन्ट लागेर मृत्यु भएको छ । हल्दिवारी ३ स्थित रनकाली सामुदायिक वनभित्र छावा हात्तीको करेन्ट लागेर मृत्यु भएको हो ।
रनकाली सामुदायिक वन उपभोक्ता समूहको कार्यालयको ५० मिटर नजिकै हात्ती मृत अवस्थामा फेला परेको डिभिजन वन कार्यालय झापाका विष्णुलाल घिमिरेले जानकारी दिए । उनका अनुसार करिब तीन वर्षको छावा मत्ता हात्तीले आफ्नो सुँडले करेन्ट प्रवाह भएको अर्थिनको तार छोएपछि मृत्यु भएको हो ।
घटनास्थलमा हात्ती हेर्न आउने स्थानीयको भीड लागेको छ । केही स्थानीयलाई मृत हात्तीलाई पूजा गर्दै फुल तथा पैसा चढाएका छन् । रनकाली सामुदायिक वन उपभोक्ता समूहले जङ्गल नजिकैको बस्तीमा दिनहुँ जङ्गली हात्ती निस्किन थालेपछि त्यसबाट बच्न जङ्गल वरिपरि विगत ८ वर्षदेखि विद्युतीय तरबारको रूपमा अर्थिन करेन्ट लगाउँदै आइरहेको छ ।
२०६७ सालदेखि अहिलेसम्म झापामा छावा हात्तीसहित ११ वटा जङ्गली हात्ती र ३९ जना मानिसको मृत्यु भइसकेको छ ।
