६ साउन,विराटनगर ।
नेपाली कांग्रेस मोरङले मोरङ व्यापार संघ र विराट व्यापार संघका नवनिर्वाचित कार्यसमितिलाई सम्मान गरेको छ । पार्टी कार्यालयमा सोमबार आयोजित कार्यक्रममा कांग्रेसले दुवै संस्थाका कार्यसमितिलाई सम्मान गरेको हो ।
कार्यक्रममा मोरङ व्यापार संघका अध्यक्ष प्रकाश मुन्दडा, वरिष्ठ उपाध्यक्ष नविन रिजाल, महासचिव अनिल साह, विराट व्यापार संघका अध्यक्ष सुजन थापालगायत पदाधिकारी र सदस्यहरुलाई केन्द्रीय सदस्य एवं सांसद डा. डिला संग्रौला, अमृत अर्याल, हसन अन्सारी, मोरङ सभापति डिगबहादुर लिम्बूलगायतले अविर र खादा लगाएर सम्मानपत्र प्रदान गरेका थिए । नेपालको राजनैतिक र आर्थिक क्रान्तिमा उद्योगी व्यवसायी महत्वपूर्ण योगदान भएकाले दुवै संस्थाका नवनिर्वाचित कार्यसमितिलाई सम्मान गरिएको मोरङ कांग्रेसका सचिव नागेश कोइरालाले बताए । उद्योगी व्यवसायीले उठाउँदै आएको मुद्दामा कांग्रेसको सधैं साथ रहने उनको भनाइ थियो ।
कार्यक्रममा मोरङ व्यापार संघका अध्यक्ष मुन्दडाले र विराट व्यापार संघका अध्यक्ष थापाले सरकारले लगाएको अचाक्ली करका कारण उद्योगी व्यवसायीहरु हतोत्साहित भएको बताए । सो अवसरमा नेपाली कांग्रेसकी केन्द्रीय सदस्य डा. डिला संग्रौलाले मुलुकमा निजी क्षेत्रको लगानी बिना वीपी कोइरालाको सपना अधुरो हुने बताइन । वीपी जयन्तीका अवसरमा नेपाली कांग्रेस मोरङले आयोजना गरेको कार्यक्रमलाई सम्बोधन गर्दै प्रतिनिधिसभा सांसदसमेत रहेकी संग्रौलाले मुलुकको आर्थिक विकासको मेरुदण्डका रुपमा रहेको निजी क्षेत्रलाई वर्तमान सरकारले उपेक्षा गरेको आरोपसमेत लगाइन । उनले निजी क्षेत्रलाई उपेक्षा गरेर समृद्धि नेपाल सुखी नेपालीको सपना देख्ने कम्युनिष्ट सरकारबाट मुलुक अगाडि बढ्न नसक्ने दाबीसमेत गरिन ।
सरकारको करका कारण निजी क्षेत्र प्रताडित भएको बताउँदै संग्रौलाले निजी क्षेत्रका मुद्दालाई कांग्रेसले संसदमा सशक्त रुपमा उठाउने बताइन । कार्यक्रममा केन्द्रीय सदस्य अमृत अर्यालले वीपीको आदर्श र सिद्धान्तलाई आत्मसाथ गर्न सकिए मुलुक आर्थिक रुपमा समृद्धि हुने चर्चा गरे ।
