साउन १६, विराटनगर । आरोहण गुरुकुल विराटनगरको आयोजनामा यही साउन १८ गतेदेखि ‘शाश्वत’ नाटक मञ्चन हुने भएको छ ।
हाटखोलास्थित सुशीला कोइराला नाटकघरमा साउन २५ गतेसम्म नाटक मञ्चन हुने आयोजक आरोहण गुरुकुल विराटनगरका अध्यक्ष भैरव क्षेत्रीले जानकारी दिए ।
नाटकमा आम–मान्छेको अन्र्तमनका भावनाहरुलाई धर्मशास्त्र र साहित्यसँग जोडेर देखाउने प्रयास गरिएको छ ।
आरोहण गुरुकुल विराटनगरका विद्यार्थीहरुको संयुक्त प्रयासमा नाटकको निर्माण गरिएको जनाइएको छ । नाटकको लेखक तथा निर्देशक अशोक गौतम हुन् भने सह–निर्देशक भरत कार्की र विकास पराजुली हुन ।
नाटकमा भरत कार्की, विकास पराजुली, सृष्टि भट्टराई र अशोक गौतमले अभिनय रहनेछ । सो नाटकमा धिरज राई र नविन रेग्मीले प्रत्यक्ष संगीत दिनेछन् । नाटकको मञ्च व्यवस्थापन राजेश ठाकुरले गरेका छन् ।
१ घण्टा अवधिको नाटक प्रत्येक दिन साँझ साढे ५ बजे मञ्चन हुने आयोजकले जनाएको छ ।
