५ भदौ, एजेन्सी ।
अमेरिकाले हालै गरेको मध्यम दूरीमा मार हान्न सक्ने क्रुज मिसाइल प्रक्षेपणसंगै कोरियाली प्रायद्विपमा एफ–३५ जेट्स तथा सैन्य उपकरण तैनाथ तयारी थाल्नु खतरनाक रहेको उत्तर कोरियाले बताएको छ ।
उत्तर कोरियाका एक प्रवक्ताले बिहीबार बताए अुनसार अमेरिकाको पछिल्लो गतिविधि खतरनाक तथा कोरियाली क्षेत्रमा नयाँ शित युद्धको सुरुवात गर्नेछ । उत्तर कोरियाको विदेश मन्त्रालयका प्रवक्ताले सबै समस्याको समाधान वार्ता तथा संवादबाट हुनु पर्छ भन्ने पक्षमा उत्तर कोरिया रहेको स्पष्ट पारेका छन् ।
तर सैन्य चुनौतिबाट वार्ताका लागि दिइएको दबाबले आफूहरुलाई वार्ता तथा संवादका लागि आकर्षित नगर्ने ती प्रवक्ताले बताएको उत्तर कोरियाको समाचार संस्था केसिएनएलाई उद्धृत गर्दै समाचार संस्था रोयटर्सले जनाएको छ ।
वक्तव्यमा भनिएको छ, ‘हाल खतरनाक तथा असामान्य सैन्य गतिविधि यो क्षेत्रमा बढी रहेको छ, जसले कोरियाली प्रायद्विपमा नयाँ शित युद्ध सुरु गर्न सक्छ ।’ अमेरिकाले अगस्ट १८ मा क्रुज मिसाइल प्रक्षेपण गरेको थियो ।
गएको फेब्रुअरीमा हानोइमा भएको अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ–उनबिचको वार्ता असफल भए यता कुनै वार्ता हुन सकेको छैन ।
