भदौ ११, एजेन्सी । म्यानचेस्टर युनाईटेडका फरवार्ड एलेक्सीस सान्चेज इन्टर मिलानमा अनुबन्धित हुने भएका छन् ।
यसै सिजन युनाइटेडबाट अर्का स्ट्राइकर रोमेलु लुकाकुलाई ८० मिलियन युरोमा अनुबन्ध गरेको इन्टरले सान्चेजलाई तत्कालका लागि लोनमा लिन लागेको हो ।
इन्टरका प्रमुख एन्टोनिया कोन्टेले आगामी सोमबार युरोपियन खेलाडी किनबेचको विन्डो अगाडी सान्चेजलाई अनुबन्ध गर्ने बताएका छन् । यो सिजनको अन्तिममा सान्चेजलाई इन्टरले औपचारिक रुपमा खरिद गर्ने जनाएको छ ।
इन्टरबाट सान्चेजले साताको चार लाख पाउण्ड पाउने अपेक्षा गरेका थिए । तर त्यो रकम इन्टरको खेलाडीलाई दिने रकमभन्दा बाहिर रहेको बताउँदै साताको एक लाख ५० हजार पाउण्डको अफर गरेको थियो ।
२०१८ मा आर्सनलबाट युनाइटेडमा अनुबन्ध भएका सान्चेज वल्ड ट्राफोर्डमा १९ महिना रहँदा राम्रो प्रदर्शन गर्न सकेनन् । उनले ४५ खेलमा पाँच गोलमात्र गर्न सके । उनले गत सिजनको प्रिमियर लिगमा एकै खेलमा दुई गोल एक पटकमात्र गर्न सफल भए ।
