१४, भदौ, काठमाडौं ।
गृहमन्त्रालयले सुर्खेतमा भएको गौहत्या प्रकरणबारे छानबिन गर्नका लागि छानबिन समिति गठन गरेको छ ।
शनिबार गृहमन्त्रालयले विज्ञप्ति जारी गरी गृहमन्त्रालयका उपसचिव सागरमणि पाठकको संयोजकत्वमा ४ सदस्यीय छानबिन समिति गठन गरिएको जानकारी दिएको हो । छानबिन गरी प्रतिवेदन १५ दिनभित्र बुझाउन गृहले निर्देशन दिएको छ ।
शव व्यवस्थापनको जिम्मेवारी वीरेन्द्र नगर नगरपालिकालाई जिम्मा दिइएको छ । बुधबार राति वीरेन्द्रनगरभन्दा माथि कटकुवा जंगलमा गाई भिरबाट खसालिएको भेटिएको थियो। गृहका अनुसार त्यहाँ २४ वटा गाईगोरु मरेका भेटिएको हो ।
नेपालगञ्जमा रहेको काञ्जी हाउसबाट दैलेख लाने भनेर ३ सय ७० वटा गाईगोरु जिल्ला प्रशासन कार्यालय बाँकेको सिफारिसमा ८ वटा ट्रकमा ल्याइएको थियो। ती गाईगोरु बाटोमा फाल्दै ल्याइएको भेटिएको छ ।
वीरेन्द्रनगरको कटकुवा क्षेत्रमा बेवारिसे छोडिएका मध्ये १ सय ४४ वटा गाई नेपालगञ्ज फिर्ता पठाइएको छ । नेपालगञ्ज उपमहानगरपालिकाका सूचना अधिकारी शरदकुमार पौडेलका अनुसार दैलेखका लागि ल्याइएका गाईहरू नगर प्रहरीको नेतृत्वमा लगिएको थियो ।
भीरबाट तीन सय गाई खसाल्ने पाँच ट्रक नियन्त्रणमा लिइएको छ।
