इटहरी, ५ फागुन ः प्रदेश नंं १ का मुख्यमन्त्री शेरधन राईले नेपालमा धेरै परिवर्तनकामी आन्दोलन र बलिदानपछि प्राप्त संविधान एवं त्यसको उपलब्धिलाई अव संस्थागत गर्नुपर्ने बताए ।
सुनसरीको पर्यटकीय एवम् तालतलैया क्षेत्रमा नेपाल कर्मचारी सङ्गठन, सुनसरीले निर्माण गरेको शहिद स्मारक एवं विश्रामालयको आज उद्घाटन गर्दै शहीदले गरेको त्याग एवं बलिदानको सुनसरी कर्मचारी सङ्गठनले उचित मूल्याङ्कन गरेकोमा खुशी समेत व्यक्त गरे।
विसं २०४७ को कर्मचारी आन्दोलनका क्रममा कास्कीमा ज्यान गुमाएका कर्मचारी झपेन्द्र कार्की र नारायणकाजी जोशीका छोरा मनोज जोशीलाई कर्मचारी शहीदका रुपमा सम्झना गर्दै रु सात लाखको लगानीमा सालिक निर्माण गरेर सुनसरी कर्मचारी सङ्गठनले उदाहरणीय एवं प्रशंसनीय कार्य गरेकोप्रति मन्त्री राईले धन्यवाद दिए ।
मुख्यमन्त्री राईले अब नयाँ संविधानले आम नेपाली जनतालाई समृद्ध नेपाली नागरिक बनाउने महान कार्यमा सबै राजनीतिक दलहरू एकैठाउँमा उभिएर देश बनाउने साझा अभियानमा जुट्नुपर्ने आवश्यकता औँल्याए ।
नेपाली जनताले आफ्नो भाग्य र भविष्य सुन्दर बनाउनका लागि धेरै त्याग, बलिदान र आहुती समेत गरिसकेर धेरै उपलब्धिहरू हासिल गरिसकेकाले ती उपलब्धिलाई संस्थागत गर्दै देशलाई समुन्नतितिर अग्रसर गराउने साझा अभियानमा एकजुट भएर काम गर्न सबैको ध्यानाकर्षण गराए ।
कार्यक्रममा सङ्गठनका अध्यक्ष भवानी धमला, प्रदेश सांसदद्वय सर्वध्वज साँवा र अमिरबहादुर गुरुङलगायतले बोलेका थिए । (रासस)
