७ कात्तिक, काठमाडौं ।
वुमन्स च्याम्पियन्स लिग(डब्लूसिएल)को उपाधि चितवन राइनोजले जितेको छ । विहीबार काठमाडौँको त्रिवि क्रिकेट मैदानमा भएको फाइनल खेलमा क्याट क्विन्स काठमाडौंलाई ४५ रनले पराजित गर्दै चितवनले उपाधि जितेको हो ।
जितका लागि १ सय १३ रनको लक्ष्य पछ्याएको काठमाडौं २० ओभरमा अल आउट हुँदै ६७ रनमा समेटियो । काठमाडौंका कुनैपनि खेलाडीले राम्रो प्रर्दशन गर्न सकेनन् । तेस्रो ओभरको पहिलो बलमा ओपनर शोभा आलेलाई सुमन खतिवडाले ६ रनमा बोल्ड आउट गरिन् । चौथो ओभरको अन्तिम बलमा रेखा रावलले रोमा थापाले विकेटकीपर काजल श्रेष्ठबाट शून्यमा आउट गरिन् । छैटौं ओभरको पाँचौ बलमा कप्तान रुविना क्षेत्री बेलवासी २ रनमा क्याच आउट भएपछि काठमाडौं संकटमा परेको थियो । आठौं ओभरको पाँचौ बलमा नितु भण्डारी २ रनमा रन आउट भएपछि काठमाडौंको जितको संभावना सकिएको थियो ।
१४ ओभरको पहिलो बलमै अप्सरी बेगमलाई रितु कनौजियाले १५ रनमा बोल्ड आउट गरेपछि चितवन उपाधि लगभग पक्का बनेको थियो । इश्वरी बिष्ट १३ रनमा आउट भइन् । चितवनको जितमा सुमन खतिवडाले ४ ओभरमा १ मेडन सहित ११ रन खर्चेर ३ महत्वपूर्ण विकेट लिइन् । त्यस्तै रेखा रावलले ४ ओभरमा १ मेडन सहित ९ रन खर्चेर २ विकेट लिइन् । रितु कनौजियाले ४ ओभरमा १ मेडन सहित ७ रन खर्चेर ३ विकेट लिइन् ।
त्यसअघि टस हारेर ब्याटिङ थालेको चितवनले २० ओभरमा ४ विकेटको क्षतिमा १ सय १२ रन जोडेको थियो । कप्तान इन्दु बर्मा १९ बलमा ४ चौका २२ र प्यारी चाधरी ३ रनमा अविजित रहे । इन्दुले सरस्वती कुमारी चौधरीलाई अन्तिम ओभरको चौथो,पाँचौ र छैटौं बलमा लगातार चौका प्रहार गर्दै बलियो योगफल सम्म पुर्याएकी थिन् । चितवनले नवौं ओभरको पाँचौ बलमा पहिलो विकेटका रुपमा ओपनर काजल श्रेष्ठलाई २१ रनमा गुमाएको थियो ।
सरस्वती कुमारीले नितु भण्डारीबाट उत्कृष्ट क्याच गराउँदै कञ्चन श्रेष्ठ र काजलबीच पहिलो विकेटको ४९ रनको साझेदारी तोडिन् । लगत्तै १० ओभरको पहिलो बलमा लक्ष्मी साउदले अर्की ओपनर कञ्चन श्रेष्ठलाई १९ क्याच आउट गरेकी थिइन् । सुमन खतिवडाले २५ बलमा ५ चौका सहित २९ रन जोडिन्। सुमनलाई १५ ओभरको अन्तिम बलमा संगिता राईले बोल्ड आउट गरिनन् । रितु कनौजिया ६ रनमा रन आउट भइन् । काठमाडौंकी संतिगा राई,लक्ष्मी साउद र सरस्वती कुमारी चौधरीले १–१ विकेट लिएका थिए ।
उपाधि विजेता बनेसँगै चितवनले ७ लाख प्राप्त गर्दा उप विजेता काठमाडौंले ३ लाखमा चित्त बुझाएको छ ।
