१३ कार्तिक, सुनसरी । मंसिर १४ गते हुने उपनिर्वाचन नजिकिँदै गर्दा धरान उपमहानगरपालिकामा राजनीतिक दलहरु चुनावी प्रचारप्रसारमा लागेका छन् ।
नेपाली कांग्रेस, संघीय लोकतान्त्रिक राष्ट्रिय मञ्च, समाजवादी पार्टी नेपालले मेयरको उम्मेदवार घोषणा गरेर चुनावी प्रचारमा होमिएका छन् । यस्तै मेयर पदका लागि एक जनाले स्वतन्त्र उम्मेदवारीसमेत घोषणा गरेका छन् ।
धरानका मेयर तारा सुब्बाको निधन भएपछि आगामी १४ गते हुने चुनावमा सत्तारुढ नेपाल कम्युनिष्ट पार्टी(नेकपा)ले भने अझै मेयरको उम्मेदवार टुंगो लगाउन सकेको छैन । गएको साउन १ गते मिर्गौलाको रोगबाट पीडित तारा सुब्बाको उपचारको क्रममा निधन भएको थियो ।
नेपाली कांग्रेसले तिलक राईलाई धरान उपमहानगरको उम्मेदवार घोषणा गरिसकेको छ । तिलक राई यसअघिको स्थानीय तहको चुनावमा तारा सुब्बासँग पराजित भएका थिए ।
यसैगरी समाजवादी पार्टीले भने गजेन्द्र इस्वालाई उम्मेदवार बनाएको छ । संघीय लोकतान्त्रिक राष्ट्रिय मञ्चले भने अमर इजमलाई धरानको मेयरको उम्मेदवार बनाएको छ । यस्तै हर्क साम्पाङ्गले स्वतन्त्र रुपमा उम्मेदवारी घोषणा गरिसकेका छन् । स्थानीय तहको चुनावमा तत्कालीन एमालेबाट उम्मेदवारी दिएका तारा सुब्बा २० हजार ९ सय ७५ मत ल्याएर विजयी भएका थिए ।
त्यस्तै नेपाली कांग्रेसका उम्मेदवार तिलक राईले १६ हजार १ सय २ मत प्राप्त गरेका थिए । तत्कालीन माओवादी र तत्कालीन संघीय समाजवादी फोरमको संयुक्त प्यानलका उम्मेदवार आइन्द्रविक्रम बेघाले ११ हजार एक सय ८१ मत पाएका थिए । धरानमा ५२ हजार ८ सय ५३ जना मतदाता रहेका छन् ।
यसैविच, चुनावको मिति नजिकिँदै गर्दापनि नेकपाले भने अझै धरान उपमहानगरको मेयरको उम्मेदवार कसलाई बनाउने भनेर टुंगो लगाउन सकेको छैन । आन्तरिक गुट र नेताहरुमा उम्मेदवार बन्ने तीव्र इच्छाका कारण उम्मेदवारको टुंगो लाग्न नसकेको हो ।
तत्कालीन एमालेले यसअघिका तीन वटै चुनावमा धरानको मेयर पदमा विजय हाँसिल गरेको थियो । माओवादीसँग एकता भएपछि जित सुनिश्चत हुने भन्दै नेताहरु उम्मेदवार बन्नका लागि दौडधुप गरिरहेका छन् ।
धरानको मेयरको उम्मेदवारमा अहिले पूर्व मेयर मनोज मेन्याङ्वो, प्रकाश राई, विजय राई, आइन्द्रविक्रम बेघा लगायतका नेताको चर्चा छ । नेकपाका नेता मुक्साहाङ मेन्याङ्वोले केही दिनमै उम्मेदवारको टुंगो लगाउने बताए । नगर कमिटिले बुधबार उम्मेदवारको नाम सिफारिस गर्दैछ । बुधबार नै जिल्ला कमिटीले पनि आएका नामहरुलाई प्रदेशमा पठाउने नेकपा स्रोतले जनाएको छ ।
