१६ कात्तिक, एजेन्सी ।
लडाकुहरुले सैनिक पोस्टमा आक्रमण गर्दा मालीमा ५३ सैनिकको ज्यान गएको छ । यस्तै अर्का एक सर्वसाधारणको पनि आक्रमणमा मृत्यु भएको स्थानीय अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् ।
मालीको उत्तर–पूर्वी क्षेत्रमा रहेको सेनाको पोस्टमा बिद्रोही लडाकुले आक्रमण गरेका हुन् । पछिल्लो एक दशकमा मालीमा सैनिकमाथि भएको यो सबैभन्दा ठूलो आक्रमण हो ।
माली आर्मीले ट्वीट गरेर घटनाबारे जानकारी दिँदै यो आतंकवादी आक्रमण रहेको जनाएको छ । सन् २०१२ मा देशको उत्तरी क्षेत्रमा इस्लामिक लडाकुले नियन्त्रण कायम गरे यता मालीमा हिंसाको अवस्था छ ।
फ्रान्सेली सेनाको सहयोगमा मालीले सो क्षेत्रमा पुनः आफ्नो नियन्त्रण कायम गरेको छ । तर अस्थिरता भने कायम छ ।
