१९ कार्तिक, जनकपुर । प्रदेश २ को मुख्यमन्त्री तथा मन्त्रिपरिषदको कार्यालयमा ताला लगाउन गएका अस्थायी शिक्षकलाई प्रहरीले पक्राउ गरेको छ ।
मंगलबार प्रदेश २ का अस्थायी शिक्षकहरू जनकपुरस्थित मुख्यमन्त्री तथा मन्त्रिपरिषद्को कार्यालयमा ताला लगाउन गएका थिए । तीमध्ये ४३ जना शिक्षक पक्राउ परेको धनुषाका प्रहरी नायब उपरीक्षक रामेश्वर कार्कीले जानकारी दिए ।
पक्राउ परेका शिक्षकलाई अहिले जिल्ला प्रहरी कार्यालय धनुषामा राखिएको उनले बताए । सोमबार अस्थायी शिक्षकले मुख्यमन्त्री तथा मन्त्रिपरिषदको कार्यालय अगाडि एक घन्टा सडक अवरूद्ध गरेका थिए । मुख्यमन्त्री लालबाबु राउतले अस्थायी शिक्षकको मागप्रति प्रतिवद्धता जनाएर बेवास्ता गरेको भन्दै अस्थायी शिक्षकको समूह तालाबन्दी गर्न गएको थियो ।
अस्थायी शिक्षक आन्दोलन परिचालन समितिका अनुसार मुख्यमन्त्री लालबाबु राउतले संघीय सरकरसंग पहल गरेर माग पुरा गराउने प्रतिवद्धता जनाएको थिए । तीन महिना बित्दा पनि आफ्ना माग पूरा नभएको र मुख्यमन्त्रीले बेवास्ता गरेको भन्दै उनीहरूले फेरि आन्दोलित भएका हुन् ।
अस्थायी शिक्षकलाई पूर्ववतस् रूपमा उमेरको हदसम्म पेसाको ग्यारेन्टी र स्वास्थ्य उपचारलगायत माग राख्दै असार २० गतेदेखि उनीहरू कार्यालय अगाडि करिब डेढ महिना धर्नामा बसेका थिए । सरकारको गलत नीतिका कारण प्रदेश २ का करिब १ हजार २ सय शिक्षकको रोजगार खोसिएको अस्थायी शिक्षकका संयोजक धमेन्द्र यादवको भनाइ छ ।
