३० कात्तिक, एजेन्सी ।
कप्तान लियोनेल मेस्सीले निर्णायक गोल गरेपछि ब्राजिललाई पराजित गर्दै अर्जेन्टिनाले सुपरक्लासिको उपाधि जितेको छ ।
फिफा अन्तर्राष्ट्रिय मैत्रीपूर्ण खेलमा ब्राजिलले सुरुवातमै पाएको पेनाल्टीलाई सदुपयोग गर्न सकेन । खेलको ९औँ मिनेटमा गाब्रियल जिससले प्रहार गरेको पेनाल्टी सही दिशामा रहन सकेन । जिससलाई नै गेरमन पिजेलाले फल गरेपछि ब्राजिलले पेनाल्टी पाएको थियो ।
त्यसपछि १३औं मिनेटमा अर्जेन्टिनाले पेनाल्टीको अवसर पायो । मेस्सीलाई एलेक्स सान्द्रोले डिबक्समा फल गर्न पुगे । तर मेस्सीले पनि पेनाल्टीलाई गोलमा परिणत गर्न सकेनन् । मेस्सीको प्रहारलाई ब्राजिलका गोलकिपर एलिसन बेकरले रोकिदिए ।
त्यसको लगत्तै अर्जेन्टिनाले खेलमा अग्रता बनायो । उसका लागि मेस्सीले गोल गर्न सफल भए ।
खेलको सुरुवातमा नै अग्रता बनाएको अर्जेन्टिनाविरुद्ध ब्राजिलले बारम्बार दबाव दिए पनि गोल फर्काउन सकेन । जसका कारण ब्राजिलविरुद्ध अर्जेन्टिनाले साघुँरो जित निकाल्यो ।
