४ मंसिर, विराटनगर ।
न्यूरो कार्डियो एण्ड मल्टिस्पेसियालिटि हस्पिटलको विस्तारित शाखा मदर एण्ड चाईल्ड हस्पिटलले ‘६५ औं अन्तराष्ट्रिय बाल दिवस —२०१९’ बालबालिकाहरुको निःशुल्क स्वास्थ्य परिक्षण गरी भव्यताका साथ मनाएको छ । मदर एण्ड चाइल्ड हस्पिटलको मुख्य आयोजना तथा रोटरी क्लब अफ बिराटनगर , डाउन टाउनको सहकार्यमा बिराटनगर महानगरपालिका वडा नं ४ स्थित श्री लक्ष्मीनारायण मन्दिर जीयर शैक्षिक संस्थामा अध्यनरत बालबालिकाहरुको निःशुल्क स्वास्थ्य परीक्षण गरिएको हो ।
‘आजका बालबालिका भोलीका अभिभावक’ भन्ने मूल नाराका साथ अन्तराष्ट्रिय बाल दिवस मनाइएको छ । कार्यक्रममा बोल्दै प्रमुख अतिथि एवम् बरिष्ठ न्यूरोलोजिष्ट डा. बिरेन्द्र कुमार विष्टले नेपाल सहित विश्वका १९३ राष्ट्रहरूले यो महासन्धिलाई अनुमोदन गरिसकेका र बालबालिकाहरूको आधारभूत स्वास्थ्य आवश्यकताहरु पूरा गरी उनीहरुको निःशुल्क स्वास्थ्य परिक्षण गराउने उद्देश्यले यस किसिमको कार्यक्रम आयोजना गरिएको बताए।
यस्तै रोटरी क्लब अफ बिराटगर डाउन टाउनका अध्यक्ष गंगा प्रसाद यादवले न्यूरो हस्पिटलको सहकार्यमा यस किसिमका निःशुल्क स्वास्थ्य परीक्षण आगामी दिनमा समेत गरिने तथा स्टेसनरी सामान समेत वितरण गरेको बताए । हस्पिटलका वरिष्ठ बाल रोग विशेषज्ञ डा. सुरेश प्रसाद साह र बरिष्ठ दन्त रोग विशेषज्ञ डा. अमित प्रताप साहले बिद्यालयका बालबालिकाहरु स्वास्थ्य परिक्षण गरेका थिए ।
न्यूरो हस्पिटलका अपरेशनल डाइरेक्टर राजेश भटट्राईले बालबालिका हेतु आयोजना गरिएको स्वास्थ शिविरलाई निरन्तरता दिने बताए । हस्पिटलले यस अघि भानु स्कुल , होलिल्याण्ड स्कुल , कान्तिपूर स्कुल , गौतम बुद्ध मेमोरीयल स्कुल , देबकोटा स्कुल , मदर टेरेसा स्कुलमा निःशुल्क स्वास्थ्य शिविर सञ्चालन गरी बिरामीको निःशुल्क उपचार गरिएको हस्पिटलका कार्यकारी निर्देशक अनिषा विष्टले जानकारी दिइन् ।
