१७ मंसिर, काठमाडौं ।
१३ औं सागको उसुतर्फ बुधबार भएको खेलमा श्रीलंका खेलाडीले स्वर्ण पदक जितेपछि नतिजा धाधलीपूर्ण भएको भन्दै नेपाल र भारतीय उसु टोलीका खेलाडी, अफिसियलले विरोध जनाएका छन् ।
बुधबार लगनखेलस्थित नेपाली सेनाको तालिम तथा प्रशिक्षण केन्द्रमा सुरु उसुको पुरूष ताइजीतर्फ नेपाल, भारत, श्रीलंका र बंगलादेशका खेलाडीले प्रतिस्पर्धा गरेका थिए ।
श्रीलंकाका थरिन्दु निर्मल अनुराधाले ९.२१ अंक पाए भने भारतका ज्ञानदेश सिंहले ९.१५ र नेपालका हरिप्रसाद गोलले ९.०५ अंक पाएका थिए । तर फल्ट गणना गर्दा श्रीलंकन खेलाडीलाई धेरै अंक दिइएको भन्दै नेपाल र भारतका प्रशिक्षकले विरोध गरे ।
त्यसक्रममा दर्शकहरूले मैदानमा बोतल फालेपछि खेल झन्डै आधा घन्टा अबरुद्ध भएको थियो । पछि उनीहरुलाई प्रहरी लगाएर हटाइएपछि अब अन्य खेलहरु सन्चालन हुने क्रममा रहेका छन् ।
खेलमा थारिन्तु नामाल अनुरथाले स्वर्ण पदक जितेका छन् , भारतका ज्ञानदास सिंहले रजत र नेपालका हरि प्रसाद गोलले कास्य पदक जितेका छन् । उसुको पहिलो दिन नेपाली खेलाडी विजय सिन्जाली र सुस्मिता तामाङले स्वर्ण पदक जितेका थिए ।
