१९ मंसिर, विराटनगर ।
प्रदेश १ सरकारले सिंघीया खोलाको संरक्षण र सरसफाई गर्ने भएको छ । ‘सिंघीया खोलाको सफाई अभियान, हामी सबैको शान’ भन्ने मूल नाराका साथ प्रदेश सरकारले मोरङका पाँचवटा स्थानीय तहसँग मिलेर आगामी शनिबारबाट अभियानको थालनी गर्न लागेको हो ।
सरसफाई अभियानमा विराटनगर महानगरपालिका तथा कटहरी, बूढीगंगा, ग्रामथान र जहदा गाउँपालिकासँग सहकार्य गरिने भएको प्रदेश १ सामाजिक विकास मन्त्रालयले जनाएको छ । विराटनगरको पुष्पलाल चौक पूर्वको घिनाघाटदेखि खोला सफाई अभियान सुरु हुने मन्त्रालयका निमित्त सचिव गणेशप्रसाद अधिकारीले जानकारी दिए ।
सरसफाई अभियानका लागि समिती पनि गठन गरिएको छ । गठन गरिएको समितीमा सामाजिक विकास मन्त्री जीवन घिमिरे संयोजक र विराटनगर महानगरपालिकाका मेयर भीम पराजुली सह–संयोजकसहित सिंघीया खोलासँग जोडिएका स्थानीय तहका प्रतिनिधि, सरकारी कर्मचारी, सुरक्षा अधिकारी लगायत सरोकारवाला निकाय प्रतिनिधि छन ।
सफाईका विषयमा जानकारी दिन आयोजित पत्रकार सम्मेलनमा मेयर पराजुलीले सरससफाई महाअभियान सन्देशमुलक र जनचेतनामुलक हुने बताए । संकलित फोहोर डम्पिङ साइडसम्म लगेर व्यवस्थापन गरिने पराजुलीको भनाइ छ ।
मन्त्री घिमिरेले अत्यधिक प्रदूषण बढेपछि पहिलो चरणमा घिनाघाटदेखि भाथिगछ पुलसम्मको १० किलोमिटर क्षेत्र सफाई गरिने जानकारी दिए । सफाईका हिसावमा प्रदेशमा जागरण ल्याउन लागिएको उनको भनाइ छ ।
सरसफाईका लागि मन्त्रालयले एक सय ७० जोर गम्बुट, एक सयवटा डोको, एक हजार पाँच सयवटा माक्स, पाँच सयवटा डिस्पोजेवल पञ्जा, खानेपानी, माइक तथा स्पिकरको व्यवस्था गर्नेछ ।
महानगरपालिकाले सात सयवटा एप्रोन, एक सयवटा फोहोर तान्ने काँटा, २० वटा बेलल, २० वटा दविया, ५० वटा कचिया, २० वटा फोरुवा, २० वटा डस्बिन र २० पिस डोरी उपलब्ध गराउने छ ।
