२२ मंसिर, विराटनगर ।
विराटनगरको नोेवेल शिक्षण अस्पतालमा सुत्केरीको मृत्यु भएपछि मृतकका आफन्तले विरोध प्रदर्शन भएको छ । चिकित्सकको लापरवाहीले मृत्यु भएको उनीहरुको आरोप छ ।
विरोध प्रदर्शन गरेपछि अस्पताल क्षेत्र तनावग्रस्त बनेका थियो । शल्यक्रियामार्फत प्रसूति गराइएकी २९ वर्षीया जानुका श्रेष्ठको मृत्यु भएपछि आइतबार दिउँसोदेखि मृतकका आफन्तले प्रदर्शन गरेका हुन् ।
इलामको फिक्कल घर भइ मोरङको लेटाङ नगरपालिका–६ खेरुवास्थित माइतीमा बस्दैआएकी श्रेष्ठलाई प्रसूति व्यथाले च्यापेपछि शुक्रबार साँझ नोवेलमा भर्ना गरिएको थियो ।
अस्पतालकी बरिष्ठ स्त्री रोग विशेषज्ञ डा. शान्ति सुवेदी नेतृत्वको टोलीले राति १० बजे शल्यक्रिया गरेर प्रसूति गराएको थियो । श्रेष्ठको अवस्था गम्भीर बन्दै गए पनि चिकित्सकले वास्ता नगरेको जानुकाका बुवा गणेशकुमार श्रेष्ठले बताए ।
शल्यक्रियापछि रक्तश्राव नरोकिएर जानुकाको मृत्यु भएको आरोप आफन्तले लगाएका छन् । सुत्केरीको मृत्यु भएपछि परिवारका सदस्य र आफन्त शनिबार शव अस्पतालमै छाडेर गएका थिए । उनीहरुले अहिले पनि शव बुझ्न अस्वीकार गरेका छन् ।
नाराजुलुस गर्दै प्रसूति वार्डतिर हुल बढेपछि रोक्न खोज्दा मृतक पक्ष र प्रहरीबीच झडप समेत भएको छ । अस्पताल भित्र पसेको हुललाई साँझ प्रहरीले सामान्य बल प्रयोग गरेर बाहिर निकालेको छ ।
लापरवाही गर्ने चिकित्सकलाई कारवाही हुनुपन, पीडित पक्षलाई उचित क्षतिपूर्ति दिइनुपर्ने उनीहरुको माग छ । शल्यक्रिया र उपचारमा चिकित्सकले कुनै लापरबाही नगरेको अस्तालको दावी छ ।
