२ पुस, पोखरा ।
पोखरा प्रिमियर लिग (पीपीएल) मा विराटनगर टाइन्टसले साविक विजेता पोखरा पल्टनलाई हराएको छ । बुधबार पोखरा रंगशालामा भएको खेलमा विराटनगरले पोखरालाई ४५ रनले पराजित गर्दै अघिल्लो चरणको संभावना कायमै राखेको हो । १ सय ४६ रनको लक्ष्य पछ्याएको पोखरा पल्टन १९।५ ओभरमा एक सयमा रनमा अल आउट भयो ।
चौथो ओभरको दोस्रो बलमा जितेन्द्र मुखियाले ओपनर कुशल भुर्तेललाई २४ रनमा एलबी डब्लू आउट गरे । भुर्तेलले १३ बलमा ३ छक्का र १ चौका प्रहार गरे । जितेन्द्रले यसै ओभरको पाँचौ बलमा भारतीय ब्याट्सम्यान रविइन्दर सिंहलाई शून्यमा बोल्ड आउट गरे । ११ औं ओभरको पाँचौ बलमा साहब आलमले आशिफ शेखलाई १३ रनमा कट एण्ड बोल्ड आउट गरे । उनले २२ बलमा १ चौका प्रहार गरे । १२ औं ओभरको चौथो बलमा पाकिस्तानका स्पिनर नोमन खानले कुशल मल्ललाई शून्यमा एलबीडब्लु आउट गरेपछि पोखरा ७०–४ को कमजोर अवस्थामा पुगेको थियो । १३ औं ओभरको पाँचौ बलमा कप्तान शरद भेषावकरलाई मोहम्मद जैद आलमले शून्यमा एलबी डब्लू आउट गरेपछि पोखरा संकटमा परेको थियो ।
रोहित कुमार पौडेल जैदको १५ औं ओभरको तेस्रो बलमा ठूला सट खेल्ने क्रममा लङ अनमा साहब आलमबाट ३२ रनमा क्याच आउट हुनपुगेपछि विराटनगर जिततर्फ अघि बढेको थियो । रोहितले ३८ बलमा ३ चौका र १ छक्का प्रहार गरे । प्रथमेश दाके ३, राशिद खान ८ र ललित नारायण राजवंशी १ रनमा आउट भए । विराटनगरको लागि युवा तीब्र गतिका बलर किशोर महतोले ३.५ ओभरमा २१ रन खर्चेर ३ विकेट लिए । त्यस्तै मोहम्मद जैद आलमले ४ ओभरमा १३ रन खर्चेर २ विकेट लिए । जितेन्द्र मुखियाले ३ ओभरमा २१ रन खर्चेर २ महतवपूर्ण विकेट लिए । पुनित मेहरा, साहब आलम र नोमन खानले १–१ विकेट लिए ।
यसअघि टस हारेर ब्याटिङ थालेको विराटनगरले २० ओभरमा ५ विकेटको क्षतिमा १ सय ४५ रन बनाएका थिए । विराटनगरलाई बलियो अवस्थामा पुर्याउन भारतीय अलराउन्डर पुनित मेहराले २६ बलमा ५ चौका र ४ छक्का सहित ६१ रनमा अविजित रहे । राजु रिजाल ९ रनमा अविजित रहे । छैटौं विकेटका लागि पुनित र राजुले ५।१ ओभरमा ६९ रनको अविजित साझेदारी गरेका थिए ।
पुनितले १९ औं ओभरमा राशिद खानलाई समान २ चौका र छक्का सहित २२ रन जोडेका थिए। अन्तिम ओभरमा प्रथामेश दाकेलाई पुनितले २ छक्का र १ चौका सहित कुल २२ रननै जोडे । ओपनर सुनिल धमला र मोहम्मद जैद आलमले पहिलो विकेटका लागि ५० रनको साझेदारी गर्दै राम्रो सुरुवात दिलाएका थिए । नवौं ओभरको दोस्रो बलमा कुशल मल्लले प्रथामेथ दाकेबाट लङअनमा जैदलाई २६ रनमा क्याच आउट गराए । जैदले २७ बलमा समान २ चौका र छक्का प्रहार गरे ।
१४ औं ओभरको पहिलो बलमा सवैजीत लड्डाले ओपनर सुनिल धमलालाई कप्तान शरद भेषावकरबाट ३६ रनमा क्याच आउट गराए । धमलाले ४० बलमा समान २ चौका र छक्का प्रहार गरे । लगत्तै अर्को बलमा कप्तान प्रदीप ऐरी ६ रनमा रन आउट हुन पुगे । शरदको १५ औं ओभरको दोस्रो बलमा ठूलो सट खल्न खोज्दा नोमन खान आशिफ शेखबाट १ रनमा क्याच आउट भए ।
यसै ओभरको पाँचौ बलमा लोकेश बमलाई शरदले एलबी डब्लू आउट गर्दै २ रनमा पेभिलिएन फर्काए । पोखराका कप्तान शरद भेषावकरले २ ओभरमा १६ रन खर्चेर २ विकेट लिए । कुशल मल्ल र सर्वजीत लड्डाले १-१ विकेट लिए ।
पोखराले पहिलो खेलमा काठमाडौं गोल्डेन्स वारियर्सलाई ९ विकेटले हराएको थियो । दोस्रो खेलमा पोखरा चितवन राइनोजसँग ६ विकेटले पराजित भएको थियो । विराटनगर पहिलो खेलमा धनगढी एक्स्पर्ट ब्लुजसँग ५ रनले पराजित भएको थियो । अब हुने चौथो खेलमा पोखराले शुक्रबार बुटवल ब्लास्टर्ससँग खेल्ने छ । शनिवार विराटनगरले काठमाडौंको सामना गर्ने छ ।
