८ पुस, काठमाडौं ।
नेपालकी रसिला तामाङले चीनमा सम्पन्न जियाओजी माउन्टेन क्रसिङ कम्पिटिसनको उपाधि जितेकी छिन् । चीनको कुनमिङकमाम गत शनिबार भएको स्पर्धामा रसिलाले निर्धारित ५० किलोमिटरको ट्रेल रेस ८ घन्टा २० मिनेट ४३ सेकेन्डमा पुरा गर्दै उपाधि हात पारेकी हुन् ।
रसिलाकी निकटतम प्रतिद्वन्दी उनी भन्दा १ घन्टा १३ मिनेट पछि थिइन्। २० वर्षीय तामाङले करिव ३ सय ५० जना प्रतिस्पर्धीलाई पछि पारेकी हुन् । ट्रेल रेस सामान्य म्याराथन जस्तो सोझो रेस नभएर हाइअल्टिट्युडको अफ्ठ्यारो ठाउँमा हुने रेस हो। यसमा २ हजार मिटर अल्टिट्युडबाट शुरु भएर ४२०० मिटर अल्टिट्युडमा पुगेर फेरि २ हजार मिटरमै फर्कनुपर्ने हुन्छ । रेसमा पहाड तथा हिउँ भएको ठाउँमा पनि दौडनु पर्ने हुन्छ । धादिङको धुनीबेसीकी रसिला यसअघि एभरेस्ट म्याराथनमा पनि पहिलो भएकी थिइन् ।
प्रतियोगितामा रसिलासँगै गणेशबहादुर ठकुरी, सन्तोषविक्रम विक्रम विष्ट, दुर्गराज बुढा, दामोदर बुढा, इन्द्रकला नेम्बाङले सहभागिता जनाएका थिए । पुरुषतर्फ दुर्गराज बुढा दोस्रो तथा दामोदर बुढा तेस्रो भए । पुरुषतर्फ चीनका याङ लुक फेइले ६ घन्टा ४६ मिनेट ४१ सेकेन्डमा दौड पुरा गर्दै पहिलो स्थान हात पारेका थिए ।
