११ पुस, विराटनगर । विप्लव नेतृत्वको नेकपामा रहेका चार जनाले जिल्ला प्रशासन कार्यालय मोरङमा आत्मसमर्पण गरेका छन् ।
शुक्रबार जिल्ला प्रशासन कार्यालय मोरङमा प्रदेशसभा सदस्य कुलप्रसाद साम्बा र मानवअधिकारवादी संस्था इन्सेकका सोमराज थापाको रोहबरमा उनीहरुले आत्मसमर्पण गरेका हुन् । आत्मसमर्पण गर्नेमा मोरङको जनसत्ता प्रमुख रहेका पथरीशनिश्चरे–२ का दिपक आर्चय, मोरङ सचिव रहेका विराटनगर–३ का नवराज नेपाल, पार्टी सदस्य रहेका मिक्लाजुङ–३ का गोविन्द कार्की र जगतबहादुर पुलामि मगर रहेका छन् ।
उनीहरुले पार्टीको साधारण सदस्यसमेत नरहने गरी पार्टी परित्याग गर्दै बाँकी साधारण नागरिकको हैँसियतले जीवन बिताउन इच्छुक भएको बताएका छन् । उनीहरुले पार्टी विध्वंसात्मक, हिंस्रक र चन्दा आतंक जस्ता गतिविधिमा प्रथामिकता दिई हिंडिरहेकोले आफुहरु गलत बाटोमा हिंडेको महसुस भएकोले पार्टी परित्याग गरेको बताएका छन् ।
उनीहरुले आफूहरु उक्त पार्टीमा कथित राजनितिक परिवर्तनका निम्ति गरेका कार्यले सर्वसाधारणमा डर, त्रास भयभित वातावरणमा जीवन जीउन बाध्य भएकोमा पश्चाताप भएको बताएका छन । तसर्थ अब उप्रान्त उक्त पार्टीको कुनैपनि गतिविधिमा संलग्न नभई पार्टीको साधारण सदस्यता समेत नरहने गरी स्वेच्छाले पार्टी परित्याग गरी कानुनी राज्यलाई अंगिकार गर्ने उल्लेख गरेका छन ।
पछिल्लो समय सरकारले विप्लव नेतृत्वको नेकपालाई प्रतिबन्ध लगाएसँगै सुरक्षा निकायले विप्लवका नेता कार्यकर्तालाई निगरानी तथा धड्पकड गर्दै आईरहेको छ ।
