एजेन्सी, पुस २४
बेलायतकी महारानी एलिजाबेथका नाति राजकुमार ह्यारी र उनकी पत्नी मेगनले राजपरिवारको जिम्मेवारी परित्याग गर्ने घोषणा गरेका छन् । उनीहरुले राजपरिवारबाट अलग्गिएर आफुलाई आर्थिक रूपमा स्वतन्त्र बनाउन आफैं काम गर्ने बताएका हुन् ।
बीबीसीका अनुसार उनीहरूले उक्त निर्णय लिनुअघि शाही परिवारका कुनै पनि सदस्यसँग सल्लाह लिएका थिएनन् । उनीहरुको यो निर्णयले शाही परिवार निराश भएको बताइएको छ । राजकुमार ह्यारी र मेगनले एक बयान जारी गरेर अब उत्तरी अमेरिमा र ब्रिटेनमा आफ्नो समय बिताउने बताएका छन् ।
धेरै महिना विचार विमर्श गरेर उनीहरू उक्त फैसलामा पुगेको दुबैले बताएका छन् । बुधबार अप्रत्याशित रुपमा उनीहरूले राजदरबारबाट अलग्गिने निर्णय गरेको कुरा आफ्नो इन्स्टाग्राममा पोस्ट गरेका थिए । उनले भने,‘हामी शाही परिवारको वरिष्ठ सदस्यको हैसियतबाट हटन चाहन्छौँ । आर्थिक रूपमा स्वतन्त्र हुन काम गर्न चाहन्छौं । यसको साथै महारानीलाई हाम्रो सधैँ समर्थन रहने छ ।’
उनीहरुले अब ब्रिटेन र उत्तरी अमेरिका दुबै ठाउँमा बस्ने बताए । बीबीसीका शाही संवाददाता जोनी डायमंडका अनुसार शाही परिवारले उनीहरु यो फैसलाबाट दुखी भएको बताएका छन् ।
राजपरिवारका पूर्व प्रेस सल्लाहकार डिक्की आर्बिटर प्रिन्स ह्यारीको यो फैसलाबाट उनले दिमागले नभएर दिलले सोचेको कुरा प्रमाणित हुने बताएका छन् । उनले राजकुमारको छोरो आर्ची जन्मिने बेलामा मिडियाले गरेको व्यवहार पनि उनको यो फैसलाको एक कारण रहेको बताए ।
शाही सिंहासनमा राजकुमार ह्यारी छैठौं स्थानमा छन् । उनीभन्दा अगाडि राजकुमार चाल्र्स, राजकुमार विलियम र उनका तीन बच्चा रहेका छन् ।
