२६ मंसिर, विराटनगर । विशेष गरी तराईका क्षेत्रमा लागुपदार्थ दुब्र्यशनीमा फस्नेहरुको सख्या बढ्दै गएपछि प्रहरी लगायत सरोकारवाला निकायहरुले यसलाई रोक्न विभिन्न कार्यक्रमहरु संचालन गर्दे आएका छन् ।
प्रहरीको निगरानीपछि लागुऔषधको कारोवार र छिमेकी राष्ट्र भारतको जोगवनीबाट ओसारपसार गर्नेहरु निस्तेज भएका छन । केही महिनाअघिसम्म मोरङका विभिन्न क्षेत्रबाट दिनहँु पक्राउ पर्ने यस्ता ब्यक्तिहरु पछिल्लो समय भेटिन छाडेका छन् । यसका साथै मोरङ प्रहरीले लागुऔषध विरुद्धको अभियान अन्र्तगत सुरु गरेको लागुऔषध विरुद्ध मनोविमर्श तथा जनचेतनाको अभिवृद्धि कार्यक्रम समेत प्रभावकारी भएको पाईएको छ ।
मोरङ प्रहरी यही सफल अभियानका कारण शान्ति युवा समूहद्धारा सम्मानित भएको छ । लागुऔषधविरुद्ध प्रभावकारी अभियानको प्रशंसा गर्दै मोरङ प्रहरीलाई सो समूहले सम्मान गरेको छ । लागुऔषध सम्बन्धी कानुनको प्रभावकारी कार्यान्वयनका साथै प्रहरीले थालेको लागुऔषध विरुद्धको अभियान(Campaign Against Narcotics) ले लागुऔषध विरुद्ध मनोविमर्श तथा जनचेतनाको अभिवृद्धि गरी लागुऔषध सेवन, ओसार पसार र बेचबिखानमा कमी ल्याएको भन्दै मोरङ प्रहरीलाई सम्मान गरेको शान्ति युवा समूहले जनाएको छ ।
शुक्रबार बेलबारीमा आयोजित एक कार्यक्रमका बिच जिल्ला समन्वय समिति मोरङका प्रमुख नरेशप्रसाद पोखरेलले जिल्ला प्रहरी कार्यालय मोरङका एसपी विश्व अधिकारीलाई सम्मान पत्र प्रदान गरे । जिसस प्रमुख पोखरेल, शान्ति युवा समूहका अध्यक्ष धिरज श्रेष्ठ, सचिव अजितकुमार धिमाल र कार्यक्रम संयोजक धर्मराज राईले हस्ताक्षर गरेको सम्मानपत्रमा कानुनको प्रभावकारी कार्यान्वयन, समुदाय–प्रहरी साझेदारी कार्यक्रम र लागुऔषध विरुद्धको अभियानद्धारा गरेको पहलकदमी, साझेदारी र उपलब्धीको मुल्यांकन गर्दै प्रगति र कामनाका साथ सम्मान पत्र प्रदान गरिएको जनाईएको छ ।
मोरङ प्रहरीले गत वर्षको साउनदेखि सञ्चालन गरेको लागुऔषध विरुद्धको अभियानमा दैनिक २५ देखि ३० जनालाई सामेल गराउँदै आएको छ । यसबाट ५ हजार बढी लाभान्वित भईसकेको जिल्ला प्रहरी कार्यालय मोरङले जनाएको छ ।
