३ माघ, बाँके । बाँकेको कोहलपुर वडा नम्बर १२ का वडाअध्यक्ष कृष्णबहादुर खड्काले आत्महत्या गरेका छन् । ६८ वर्षीय खड्काले भारतको बहराइच पुगेर एक होटलमा आत्महत्या गरेका हुन् । उनको सुसाइड नोटमा बैंकको ऋण तिर्न नसकेकाले आत्महत्या गरेको उल्लेख छ । खड्काले पुस २९ गते भारतको बहराइचस्थित शंकर होटेलमा विष सेवन गरी आत्महत्या गरेका थिए । कोहलपुरका मेयर लुटबहादुर राउतले खड्काले विषादी सेवन गर्नु पहिले लखेको पत्रमा बैंकले ऋण चुक्ता गर्न निकै ताकेता गरेको हुँदा सहन नसकेर आत्महत्या गरेको व्यहोरा रहेको बताए । खड्काले आत्महत्याको लागि उपयुक्त स्थान भारतको बहराइचस्थित शंकर होटल देखेको हुँदा त्यहाँ आएर विषादी सेवन गरेको भन्दै होटल साहुलाई केही पनि दुःख नदिन आग्रहसमेत गरेका छन् । जाजरकोटबाट बसाइँ सरेर कोहलपुर आएका वडा अध्यक्ष खड्का पुस २९ गते बिहान ७ बजेतिर सुर्खेतको मेहलकुना जान भनी घरबाट निस्केको पारिवारिक स्रोतले जनाएको छ । तर उनी मेहलुकना नगई साढे १० बजेतिर सीमाना पार गरेर भारतीय बजार रुपैडिहा हुँदै बहराइच गएको मेयर राउतले जानकारी दिए । सोही दिन दिउँसो ३ बजेतिर उनले होटल बुक गरेको र त्यसपछि पत्र लेखेर आत्महत्या गरेको देखिएको छ । उनको शव भेटिएको खबर आएपछि कोहलपुर नगरपालिकाका जनप्रतिनिधि र नेपाल कम्युनिस्ट पार्टी (नेकपा) का नेताहरू बहराइच पुगेर घटनाबारे अध्ययन गरेर फर्केको मेयर राउतले जानकारी दिए । ईलाका प्रहरी कार्यालय कोहलपुरका प्रमुख तथा डिएसपी कुलदीप चन्दले पनि मेयर राउतले भनेझैं वडा अध्यक्षले विषादी सेवन गरी आत्महत्या गरेको कुरा प्रारम्भिक अनुसन्धानबाट देखिएको बताए ।
