९ फागुन, विराटनगर ।
प्रदेश १ सरकारको लगानीमा निर्माण भईरहेको घिनाघाट विराटचोक चार लेन सडक खण्डको मुख्यमन्त्री शेरधन राईले निरीक्षण गरेका छन् । शुक्रबार मुख्यमन्त्री राईले मुख्यमन्त्री राई, उद्योग पर्यटन तथा वातावरण राज्यमन्त्री विजयकुमार विश्वाससहित सम्बन्धित उच्च सरकारी अधिकारीहरुले सडक निर्माणस्थलको निरीक्षण गरेका हुन् ।
सडकको निरीक्षण गर्दै मुख्यमन्त्री राईले सडकलाई तोकिएको समय भन्दा अगाडि नै सम्पन्न गराइने बताए । संघीय सरकारबाट प्रदेश सरकारलाई हस्तान्तरण भएपछि चार लेनको बनाउन लागिएको सो २३ किलोमिटर सडक ३ वटा प्याकेजमा विभाजन गरिएको छ । जसमध्ये १०÷१० किलोमिटर २ वटा सडक ठेक्कामा लागि गत भदौ देखि निर्माण सुरु भएको थियो ।
गत भदौ २३ गते शिलन्यास भई काम सुरु भएको सो प्याकेजको काम हालसम्म ८० प्रतिशत माटो फिलिङ, ८० प्रतिशत नाला निर्माण र ५० प्रतिशत कल्भर्टको काम भएको मोरङको पूर्वाधार विकास कार्यालयका प्रमुख सुशील श्रेष्ठले जानकारी दिए । सडक निर्माणको २०७८ असार मसान्त सम्ममा सक्नेगरी करिब १ अर्ब ४० लाख लागतमा श्रेष्ठ रमण एपेक्स जेभीसँग सम्झौता भएको छ ।
अहिले सडकको दुबै किनारामा नाला निर्माण र माटो भर्ने कार्यलाई तीव्रता दिइएको छ । प्रदेश राजधानी विराटनगरलाई पूर्वी भेगसंग जोड्ने वैकल्पिक सो सडक खण्ड ६६ फिट चौडाईको हुनेछ । सडकको सिंघीया घिनाघाट, बाङ्गे, सुन्दरहरैँचा र नेता चौकमा गरी ४ वटा पुल हुनेछन् ।पुल निर्माणका लागि पनि केही दिनमा ठेक्का सम्झौता हुने श्रेष्ठले जानकारी दिए ।
