१७ फागुन, कञ्चनपुर ।
कञ्चनपुरको कृष्णपुर नगरपालिका–१ सुन्दरीफाँटाका किसानलाई ५० प्रतिशत अनुदानमा नौ लाख ५० हजार रुपैयाँ बराबरका कृषि औजार र मिनीटिलर (हाते ट्रयाक्टर) उपलव्ध गराइएको छ ।
प्रधानमन्त्री कृषि आधुनिकिकरण परियोजनाअन्तर्गत नमूना बचत कृषक तरकारी पकेट समितिलाई सो मूल्य बराबरको कृषि औजार र मिनिटिलर उपलव्ध गराइएको हो ।
समितिका सचिव गयाप्रसाद चौधरीका अनुसार परियोजना अन्तर्गत समितिलाई तीन वटा २२ हर्स पावरका मिनीटिलर, आधुनिक तरिकाले तरकारी खेती गर्न १० वटा पोलिहाउस, १५ वटा इलेक्ट्रि स्प्रे टङ्की, उत्पादीत तरकारी राख्न प्रयोग हुने ९० वटा क्रेट, रु एक लाख मूल्य बराबरका उन्नतजातको तरकारीको बीउ र रु ४५ हजार मूल्य बराबरको सुक्ष्म तत्व उपलव्ध गराइएको छ ।
कृषि औजार, पावरटिलर, बीउविजन, पोलिहाउसका लागि समितिले रु चार लाख ५० हजार र परियोजनाले रु पाँच लाख रकम लगानी गरेको छ ।
समितिमा ३१ किसान आवद्ध छन । ती किसानले अग्र्यानिक तरिकाले बाह्रै महिना तरकारी खेती गर्दै आएका छन् । यस क्षेत्रका किसानले १५ बिघा बढी जग्गामा तरकारी खेती गरेका छन् । तरकारी खेतीका लागि सुन्दरीफाँटा अग्रणी रहेको छ ।(रासस)
