२० फागुन, एजेन्सी । एसिसी पूर्व क्षेत्रीय टी-२० क्रिकेट प्रतियोगितामा सिंगापुर र हङकङले लगातार दोस्रो जित दर्ता गरेका छन् । सिंगापुरले मंगलबार भएको खेलमा मलेसियालाई १ सय २८ रनको फराकिलो अन्तरले पराजित गर्यो ।
पहिले ब्याटिङ गरेको सिंगापुरले २० ओभरमा ३ विकेट गुमाएर २ सय ३९ रन जोड्यो । उसका लागि टिम डेभिडले ३२ बलमा नटआउट ९२ रन जोडे । उनले ९ चौका र ७ छक्का प्रहार गरे । २ सय ४० रनको लक्ष्य पछ्याएको मलेसिया १५ दशमलव १ ओभरमा १ सय ११ रनमा अलआउट भयो ।
आजै भएको अर्को खेलमा हङकङले आयोजक थाइल्यान्डलाई ८ विकेटले हरायो । पहिले ब्याटिङ गरेको थाइल्यान्डले २० ओभरमा ८ विकेटको क्षतिमा ७७ रन जोड्यो । हङकङले २ विकेटको क्षतिमा ७ दशमलव ४ ओभरमा लक्ष्य पूरा गर्यो ।
प्रतियोगितामा आयोजक थाइल्यान्ड सुरुवाती तीन खेलमै पराजित भएको छ । सिंगापुर, हङकङ र मलेसियाले २-२ खेलमा जित हात पारेका छन्। तीनै टिमको समान ४-४ अंक छ ।
नेपाल सुरुवाती दुवै खेलमा पराजित भएको थियो। नेपाललाई मलेसिया र हङकङले हराएका थिए । अब नेपालले बुधबार थाइल्यान्डसँग खेल्नेछ ।
प्रतियोगिताका शीर्ष २ टिम एसिया कप छनोटमा पुग्नेछन् । अब नेपालले बाँकी रहेका दुवै खेल जिते पनि एसिया कप छनोटमा पुग्न पर्याप्त हुनेछैन । अन्य टिमको नतिजामा भर पर्नु पर्ने नेपालको सम्भावना झिनो मात्र बाँकी छ ।
