९ चैत, विराटनगर ।
विराटनगर महानगरपालिका–९ घोगापैनीस्थित श्री सर्जीइम्पेक्सले लुकाएर राखेको ११ हजार थान बढि सर्जिकल मास्क आइतबार खटिएको अनुगमन टोलीले बरामद गरेको छ ।
बजारमा मास्क र सेनिटाइजरको कालोबजारी भइरहेको बिषयमा सरोकारवालाहरुले गुनासो गरिरहेको बेला विराटनगर महानगरपालिकाका प्रतिनिधी, औषधी व्यवस्था विभाग र प्रहरी समेत सम्मिलित अनुगमन टोलीले मास्क बरामद गरिएको अनुगमन समितिका सदस्य सचिव राजेन्द्र प्रधानद्वारा जानकारी दिए ।
अनुगमन टोलीले श्री सर्जीइम्पेक्सको गोदाममा लुकाएर राखेको ११ हजार थान मास्क बरामद गरेको औषधी व्यवस्था विभागका निमित्त प्रमुख संजीव शर्मा कट्टेलले बताए । कोरोना भाइरस संक्रमणविरुद्ध सर्वसाधारणले प्रयोग गर्ने मास्क र सेनिटाइजरलाई अत्यावश्यक वस्तुसरह लिइएको बेला सर्जी इम्पेक्स विराटनगरका राजेश अग्रवालले मासक लुकाएर राखेको फेला परेको हो ।
अनुगमनका क्रममा लुकाएर राखिएको करीव चारसय हेण्ड सेनिटाइजर समेत बरामद गरिएको विराटनगर महानगरपालिकाका जनस्वास्थ्य महाशाखाले जनाएको छ ।
