१९ चैत, काठमाडौँ ।
सरकारले मेडिकल सामाग्री खरिदका लागि ओम्नी समुहसंग गरेको सम्झौता रद्द गरेको छ ।
विश्वभर कोरोना भाइरसको संक्रमण फैलिदै गएको र नेपालमा पनि कोरोनाका पोजेटिभ विरामी देखिएपछि सरकारले कोरोना परीक्षण र उपचार सम्बन्धी मेडिकल सामाग्री खरिदका लागि ओम्नी बिजनेस कर्पोरेट इन्टरनेसनलसंग सम्झौता गरेको थियो । स्वास्थ्य तथा जनसंख्या मन्त्रालयमा बुधबार आयोजित नियमित पत्रकार सम्मेलनमा स्वास्थ्य सेवा विभागका महानिर्देशक महेन्द्र प्रसाद श्रेष्ठले खरिद सम्झौता रद्द भएको जानकारी दिएका हुन् ।
सम्झौतामा उल्लेख भए अनुसारको सामान निर्धारित समय भित्र ल्याउन नसकेकाले ओम्नीसंगको सम्झौता रद्द गरिएको उनले बताए । उनले आवश्यकताको १० प्रतिशत मात्रै सामान आएको र सो सामानले केही समयका लागि पुग्ने भएकाले थप सामाग्री ल्याउनका लागि सरकारले भोली देखि नै नयाँ प्रक्रिया सुरु गर्ने पनि जानकारी दिए ।
उनले भने– “कुल कबोल अंकको १८ प्रतिशत मात्रै सामान ल्याएको र अन्य सामान नल्याएकाले आज मैले त्यो सम्झौता रद्द गरेको छु र कालो सूचीका लागि आग्रह गर्नु भनेको छु । हामीले तुरुन्तै भोली नया टेण्टर प्रक्रिया सुरु गर्दै छौ । ३ दिन भित्र सप्लायर्सको प्रस्ताव आएपछि सबै भन्दा कम भएका संग सम्झौता गर्छौ ।”
उनले कुनै पनि अस्पताललाई मेडिकल सामाग्रीको अभाव हुन नदिने प्रतिवद्धता जनाउँदै स्वास्थ्य सामाग्रीको अभावमा विरामीको उपचारमा सम्झौता नगर्न पनि अनुरोध गरे । विश्वस्तरमा संक्रमणको फैलावट तिब्र हुदै गएपछि थप सामान किन्नका लागि सरकारले प्रक्रिया अघि बढाएको भन्दै उनले सो क्रममा भएका छलफलको फेयरिस्त नै सुनाए ।
उनले ओम्नीसंग गरिएको खरिद सम्झौता बजार भाउ भन्दा २० प्रतिशत बढी भएको पनि स्वीकार गरे ।उनले भने– “बजार भाउ भन्दा २० प्रतिशत बढी थियो । बढी छ । तर ३० तारिक भित्र ल्याउनुपर्ने थियो । सबै सामान नआएकाले सम्झौता रद्द गरियो ।”
उनले र्यापिट टेस्ट किट परीक्षण पछि आवश्यकता हेरेर प्रयोग गर्ने स्पष्ट पारे । र्यापिट टेस्ट किटको परीक्षण गरेपछि मात्रै पेमेण्ट गरिने पनि उनले बताए । उनले भने “र्यापिट टेस्ट किट संसार भरी प्रयोग हुन्छ । अहिले चाईना सरकारले १९ वटा कम्पनीलाई मात्रै मान्यता दिएको छ । आईसकेको टेस्ट किटहरुको परीक्षणको क्रममा नै छ । परीक्षण भएपछि पास भएपछि मात्रै लिन्छौ र पेमेण्ट गर्छौ । ”
संक्रामक रोगको टेष्ट गर्दा जहिले र जहाँ पनि सेन्सेटिभिटी र स्पेसिभिटी हुने उल्लेख गर्दे उनले समुदायमा संक्रमण देखिएको र महामारी फैलिएको अवस्थामा मात्रै र्यापिट टेस्ट किट प्रयोग गरिने बताए । उनले भने– “७५ हजार टेस्ट किट किनेका छौ । अहिले हामीले प्रयोग गर्दैनौ । भोलि महामारी भयो भने । ५ सय भन्दा बढी विरामी भए भने तुरुन्तै हामीले त्यो टेष्ट प्रयोग गर्नु पर्छ । सबै ठाउँमा प्रयोग गर्नुपर्छ ।”
अन्तराष्ट्रिय अनुभव, सल्लाह, सुझाव र वर्तमान आवश्यकता अनुसार नै मन्त्रालयले काम गरिरहेको भन्दै अनावश्यक रुपमा प्रश्न उठाएर जनतामा नकारात्मक संदेश फैलाउने काम नगर्न पनि उनले संचारक्षेत्रलाई आग्रह गरे । उनले भने– “हरेकले प्रश्न उठाउ पाईन्छ तर प्रश्न बुझेर उठाउनु पर्छ । जनतामा नकारात्मक संदेश नजाओस् । नेपाल सरकार, स्वास्थ्य तथा जनसंख्या मन्त्रालय नेपाल र नेपालीको स्वास्थ्यका लागि दत्तचित्त छ । दिन रात काम गरिरहनुभएको छ । उहाँहरुको मनोबल गिराउने नभई बढाउने काम गरिनु पर्छ । ”
