१० वैशाख, धादिङ । युएईबाट नेपाल आएका धादिङका ३२ बर्षिय युवाले पनि उपचार पछि कोरोनालाई जितेका छन् ।
एक महिना देखि टेकुस्थित शुक्रराज ट्रपिकल तथा सरुवा रोग अस्पतालमा उपचार गराईरहेका युवाको स्थानिय तहसँगको समन्वय पछि डिस्चार्ज गरिने अस्पतालले जनाएको छ ।
यूएईबाट चैत्र ६ गते काठमाडौ आई काठमाडौको एउटा होटलमा बस्दै आएका ती युवालाई १२ गते कोरोना संक्रमण पुष्टि भएको थियो ।
युवाको पछिल्लो प्रयोगशाला परीक्षणका क्रममा नेगेटिभ रिपोर्ट आएको अस्पतालले जनाएको छ ।चैत्र ६ गते युएईको सारजाँहबाट एयर अरेवियाको उडानबाट त्रिभुवन अन्तराष्ट्रिय विमानस्थल काठमाडौ पुगेका युवा घर नगै होटलमै बस्दै आएका थिए ।
१० गते स्वाब परिक्षणको नमूना टेकूमा दिई होटलमै बस्दै आएका उनलाई १२ गते कोरोना संक्रमण प्रमाणित भएपछि मध्येरातमै होटलबाट अस्पताल पुर्याईएको थियो । कोरोना संक्रमित ४२ जना मध्ये ६ जना निको भैसकेका छन् भने ३६ जनाको अहिले पनि विभिन्न अस्पतालमा उपचार भैरहेको छ । (रासस)
