१२ बैशाख, दार्चुला । लकडाउनका कारण भारतका विभिन्न ठाउँमा अलपत्र परेका नेपालीहरु नेपाल भित्रिने क्रम अझै रोकिएको छैन । शुक्रबार बिहान दुईजना नेपाली मजदुर भारतबाट महाकाली नदी तरेर नेपाल प्रवेश गरेका छन् ।
लकडाउनका लागि कारण नेपाल–भारत जोड्ने नाकाहरु सिल भएपछि भारतमा रहेका नेपालीहरु कहिले पौडी खेलेर, ट्युब तरेर वा जङ्घार तरेर नेपाल भित्रिन थालेका छन् ।
शुक्रबार बिहान महाकाली नगरपालिका–९ उडै क्षेत्रबाट महाकाली नदिबाट जङ्घार तरेर २ जनाले नेपाल प्रवेश गरेको सशस्त्र प्रहरीले जनाएको छ ।
सशस्त्र प्रहरी बल नेपाल ५० नम्बर गुल्म हेडक्वाटर दार्चुलाका गुल्मपति डम्बरबहादुर बिष्टका अनुसार मार्मा गाउपालिका ६ निम्ठाका २५ वर्षीय प्रजापति देउरुखी र सोही ठाउँका २२ वर्षीय रेखा बोहरा देउरुखी जङ्घार तरेर नेपाल प्रवेश गरेको बताए ।
उनीहरुलाई नियन्त्रणमा लिई नगरपालिकाको क्वारेन्टाइनमा राखिएको महाकाली नगरपालिका विपद् व्यवस्थापन शाखाका संयोजक भुवन जोशीले बताए । नेपाल प्रवेश गर्ने बित्तिकै दुवैजनालाई नियन्त्रणमा लिई महाकाली नगरपालिकाको क्वारेन्टाइनमा बुझाइएको उनको भनाई छ ।
अवैधरुपमा भारतबाट नेपाल प्रवेश गर्नेक्रम बढेपछि सशस्त्र प्रहरीले जिल्लाका ९ ठाउँमा अस्थायी पोष्ट राखेर सीमामा निगरानी बढाएको भए पनि भारतको विभिन्न ठाउँमा अलपत्र परेको नेपालीहरु विभिन्न माध्यम प्रयोग गरी नेपाल प्रवेश गर्ने क्रम रोकिएको छैन ।
