२२ वैशाख, बाँके ।
हुम्लाका बासिन्दाले घर जान पाउनुपर्ने माग गर्दै बाँकेको नेपालगञ्ज विमानस्थलमा धर्ना सुरु गरेका छन्।
सिमकोटका लागि टिकट काटिसकेका उनीहरुले विमानस्थल पुग्दा उडान नहुने जानकारी पाएपछि धर्ना सुरु गरेका हुन् । सोमबारका लागि टिकट भएका ७० भन्दा बढी यात्रु विमानस्थलतर्फ जाँदा अब उडान नहुने जानकारी पाएपछि विमानस्थलको मुख्य प्रवेश मार्गमै धर्नामा बस्नुपरेको यात्रु वर्ष भण्डारीले बताए ।
नेपालगञ्जबाट हुम्लाका लागि क्याप्टेनहरुले उडान भर्न नमान्दा हुम्ला जाने यात्रुहरु रोकिएका हुन् । समिट एयरले अब उडान नै नगर्ने जनाएको छ । नेपालगञ्जमा आइतबार १५ जनामा कोरोना संक्रमण देखिएपछि हवाइ उडान रोकिएको बताइएको छ।
यसअघि पछिल्ला दुईदिनमा नेपालगञ्ज र सुर्खेतबाट झण्डै पाँच सय यात्रुलाई हवाईमार्ग हुँदै हुम्ला ओसारिएको थियो।
