२३ वैशाख, विराटनगर ।
एक करोड बढि भारतीय रुपैयाँसहित विराटनगरबाट दुई जना पक्राउ परेका छन् । मंगलबार विराटनगरको एकीकृत भन्सार जाँच चौकीमा भारतबाट नेपाल प्रवेश गरेको भारतीय ट्रकमा सशस्त्र प्रहरीको सीमा सुरक्षा बलले १ करोड ९ लाख ७९ हजार ५ सय ३० भारतीय रुपैँया बरामद गरेको हो ।
भारतको सुपौलबाट आएको डब्लूबी ७३ ई ७६७५ नम्बरको खाली ट्रकबाट प्रहरीले चेकजाँचको क्रममा कार्टुनमा राखिएको अवस्थामा उक्त रकम फेला परेको थियो । बरामद रकममध्ये ५ सय दरका २१ हजार ९ सय ५५ थान नोट रहेको छ । रकमसँगै ट्रकका चालक र सहचालक पक्राउ गरी अनुसन्धान अघि बढाईएको मोरङ प्रहरीले जनाएको छ ।
खाली गाडी भएका कारण भारतीय पक्षले परीक्षण नगरी नेपाल प्रवेशको अनुमति दिएको थियो । नेपालमा भने जाँच गर्दा बोराभित्र राखेको कार्टुनमा गुट्खाको र्र्यापरले बेरेको अवस्थामा रकम बरामद भएको सशस्त्र प्रहरीका एसपी नेत्र कार्कीले जानकारी दिए । रकम कसले के प्रयोजनका लागि ल्याएको हो भन्ने खुलेको छैन ।
