३० बैशाख, काठमाडौँ ।
चीन सरकारले पहिलोपटक कोरोना भाईरसको संक्रमण देखिएको वुहान शहरका एक करोड दश लाख जनसंख्यामा कोरोना परीक्षण गर्ने योजना बनाएको छ ।
बीबीसीका अनुसार वुहानस्थित सबै जिल्लालाई पत्राचार गरी दश दिनभित्र परीक्षण सम्पन्न गर्ने विस्तृत कार्यविधि तयार गर्न भनिएको छ । यो योजना प्रारम्भिक चरणमा नै रहेको उल्लेख गरिएको छ ।
वुहानमा करिब महिना दिनपछि छ जना नयाँ सङ्क्रमित फेला परेपछि यस्तो योजना बनाउन थालिएको हो । त्यसअघि अप्रिल ३ यता कुनै नयाँ सङ्क्रमित फेला परेको थिएन । ११ सातासम्म पूर्ण लकडाउनमा रहेको वुहान अप्रिल ८ देखि पूर्णरुपमा खुलेको थियो ।
विद्यालय, यातायात, व्यापारिक क्षेत्र सामान्य अवस्थामा फर्किरहेका थिए ।
