३ जेठ, विराटनगर ।
विराटनगरमा एक किशोरीको अपहरण गरी बलात्कार गर्ने युवालाई मोरङ प्रहरीले पक्राउ गरेको छ । विराटनगर ४ इक्राही स्थित १७ बर्षिया किशोरीलाई अपहरण गरी मकैबारीमा लगेर बलात्कार गरेको आरोपमा विराटनगर ५ का २४ वर्षीय विरेन गडेरी पाल पक्राउ परेका हुन् ।
किशोरीलाई पालले मुख थुनेर कराउन, चिच्याउनसमेत नदिई ज्यान मार्ने धाकधम्की दिएर मकैबारीभित्र लगेर बलात्कार गरेको खुलेको जिल्ला प्रहरी कार्यालय मोरङका प्रवत्ता प्रहरी नायव उपरीक्षक मानबहादुर राईले बताए ।
शुक्रबार विहानको घटनापछि फरार रहेका उनलाई प्रहरीले केही समयपछि विराटनगर ४ स्थित इक्राही दिहबारबाबा थानको छेऊबाट पक्राउ गरेको हो ।
दुई बालिका बिहान ‘मर्निङ वाक’मा निस्किएको बेला वीरेनले एक जनालाई उठाउँदै काँधमा हालेर लगी बलात्कार गरेको र सँगै हिँडिरहेकी साथीलाई उठाएर लगेपछि अर्की बालिका चिच्याउँदै घर गएर अभिभावक र छिमेकीलाई घटनाका बारेमा बताएको डिएसपी राईले बताए ।
बलात्कारपछि बालिकालाई छाडेर भागेका वीरेनलाई स्थानीयले लखेट्दै नियन्त्रणमा लिएर प्रहरीलाई बुझाएको खुलेको छ । आरोपी पाललाई प्रहरीले जिल्ला अदालत मोरङमा जर्बदस्ती करणी आरोमा मुद्दा दर्ता गराएको छ ।
