५ जेष्ठ, काठमाडौं । नेपालमा कोरोना संक्रमितको संख्या २ सय ९५ पुगेको छ ।
प्रदेश १ मा आइतबार तीन जनामा कोरोना पुष्टि भएको हो । विराटनगरमा दुई जना र धनकुटाका एक जनामा कोरोना देखिएको स्वास्थ्य तथा जनसंख्या मन्त्रालयले जनाएको छ ।
मन्त्रालयका सहप्रवक्ता डा. समिरकुमार अधिकारीका अनुसार विराटनगरका २९ वर्षीया महिला र ३६ वर्षीय पुरुषमा कोरोना देखिएको हो ।
यसैगरी धनकुटामा ३४ वर्षीय महिलामा कोरोना देखिको छ । धरानस्थित वीपी कोइराला स्वास्थ्य विज्ञान प्रतिष्ठानमा गरिएको पीसीआर परीक्षणमा कोरोना संक्रमण पुष्टि भएको हो ।
योसँगै प्रदेश १ मा कोरोना संक्रमितको संख्या ३९ पुगेको छ । तीमध्ये १७ जना उपचारपछि निको भएका छन् ।
नेपालमा कोरोनाकै कारण दुई जनाको मृत्यु भएको छ । शनिबार सिन्धुपाल्चोककी २९ वर्षीया महिलाको मृत्यु भएको थियो भने आइतबार बाँकेका २५ वर्षीय युवकको मृत्यु भएको छ । संक्रमितमध्ये ३६ जना निको भएर घर फर्किएका छन् ।
