१४ जेठ, रुकुम पश्चिम ।
अन्तरजातीय विवाह र प्रेमको विषयलाई लिएर गत शनिबार पश्चिम रुकुमको चौरजहारी ८ सोतीमा भएको घटनामा बेपत्ता भएका थप एक जना मृत अवस्थामा फेला परेका छन् । भेरी नगरपालिका–११, जाजरकोटका १८ वर्षीय लोकेन्द्र सुनारको शव घटनास्थलदेखि करीव १० किलोमिटर तल कुदु नजिक भेरी नदीको खोचमा फेला परेको हो ।
लोकन्द्रको सव स्थानियले फेला पारेको जिल्ला प्रहरी प्रमुख डिएस्पी किशोर श्रेष्ठले बताए । उनको शव जाजरकोट लगिएको छ । योसँगै मृतकको संख्या चार पुगेको छ । दुई जना अझै हराइरहेका छन् । । भेरी नगरपालिका–४, जाजरकोटका सञ्जु विक र ११ नम्वर वडाका १७ वर्षीय गोविन्द शाही बेपत्ता छन् ।
भेरी भेरी नगरपालिका–४, का २१ वर्षीय नवराज विक, रुकुम पश्चिमको चौरजहारी नगरपालिका–१, का २० वर्षीय टीकाराम नेपाली र भेरी नगरपालिका–४, जाजरकोटका १९ वर्षीय गणेश बुढा मगरको शव यसअघि नै फेला परेको थियो ।
जेठ १० गते शनिबार चौरजहारी नगरपालिका–८, सोतीका स्थानीयले जाजरकोटतर्फबाट आएका युवालाई लखेटेर भेरीमा र्पुयाएका थिए । सोतीकै एक १७ वर्षीया किशोरीसित प्रेम सम्बन्ध रहेको र उनलाई बिहेका लागि भगाउन भनेर आएका युवाहरुलाई गाउँलेले लखेटेका थिए । लखेट्ने क्रममा भेरीमा हाम्फल्दा उनीहरुको मृत्यु भएको गाउँलेको दाबी छ भने पीडित परिवारले भने जानाजान कुटपिट गरेर मारेपछि भेरीमा फालेको आरोप लगाएका छन् ।
पीडित परिवारले २० जनाविरुद्ध कर्तव्य ज्यानसम्बन्धीको किटानी जाहेरी दिएका छन् । जसमध्ये रुकुम पश्चिम प्रहरीले १२ जनालाई पक्रेको छ भने ८ जनाको खोजी जारी रहेको बताएको छ ।
