१५ जेष्ठ, काठमाडौँ । रुकुम पश्चिमको घटनालाई राष्ट्रिय मानवअधिकार आयोगलगायतले समेत जातीय विभेद र मानवताविरोधी अपराधका रुपमा चित्रण गरेका छन् । नेपाल सरकारले घटनाबारे निष्पक्ष रुपमा छानबिन गर्ने नेपालका लागि संयुक्त राष्ट्र संघकी आवासीय संयोजक भ्यालेरी जुलियान्डले विश्वास व्यक्त गरेकी छिन् ।
शनिबार अन्तरजातीय विवाहको विषयमा ४ जनाको हत्या र २ जना बेपत्ता भएको घटनाप्रति दुःख व्यक्त गर्दै संयोजक भ्यालेरीले यो घटनाले नेपालमा जातीय विभेद कायमै रहेको बताएकी छिन् । उनले भनेकी छिन्, ‘मृतकका परिवारप्रति म समवेदना प्रकट गर्न चाहन्छु र विश्वास गर्छु कि नेपाल सरकारले संविधान र अन्तर्रा्ष्ट्रिय प्रतिबद्धताबमोजिम शून्य सहनशीलता देखाउँदै यस घटनाको निष्पक्ष छानबिन गर्नेछ ।’
शनिबार रुकुमको चौरहजारी नगरपालिका सोतीमा अन्तर्जातीय विवाह गर्न खोजेको निहुँमा गाउँलेको आक्रणममा परी चारजना युवाले ज्यान गुमाएका छन् भने दुईजना अझै बेपत्ता छन् ।
जाजरकोटको भेरी नगरपालिका राना गाउँका नवराज विकले सोतीकी मल्ल थरकी आफ्नी प्रेमिका भगाउन साथीहरु लिएर गएकोमा उनीहरुमाथि आक्रमण गरिएको थियो । आक्रमणमा नवराजसहित चार जना मारिएका छन् ।
