२० जेठ, विराटनगर ।
लकडाउनका कारण लामो समयदेखि ठप्प रहन पुगेका उद्योग, कलकारखाना, व्यवसाय र बजारका कारण आम उपभोक्ताको जनजीवन कष्टकर हुनुका साथै उद्योगी व्यवसायीहरुले ठूलो आर्थिक सङ्कटको सामना गर्नुपरेको अवस्था सिर्जना भएको व्यापारीहरुको भनाइ छ ।
विश्वव्यापी महामारीको रुपमा फैलिएको कोभिड–१९ को सङ्क्रमण नेपालमा समेत देखा पर्न गई सोको रोकथाम र नियन्त्रणका लागि नेपाल सरकारद्वारा समयमै लागू गरिएको बन्दाबन्दीलाई मुलुकभरिका उद्योगी व्यवसायीहरुले मानव जीवन रक्षाप्रति उत्तरदायी भई विगत दुई महिनाभन्दा बढी समयदेखि आ–आफ्नो उद्योग व्यवसाय बन्द गरी पूर्ण समर्थन र सहयोग गर्दै आएको व्यापारीहरुले आज एक कार्यक्रममा स्मरण गराएका छन् ।
मोरङ व्यापार सङ्घले साेमबार यहाँ कोभिड–१९ को सङ्क्रमणको जोखिमप्रति सचेत रही उद्योग सञ्चालन, ढुवानी र श्रमिक व्यवस्थापन एवं आपूर्ति र बजार व्यवस्थापन गरी पुनः सञ्चालन गर्न आवश्यक प्रोटोकलबारे जिज्ञासा लिन सङ्घका अध्यक्ष प्रकाश मुन्दडाले यहाँका नेपाल कपडा व्यवसायी सङ्घ, हार्डवेयर एशोसिएशन, मोरङ इलेक्ट्रिक सङ्घ, खुद्रा व्यापार सङ्घ, नेपाल सुन चाँदी व्यवसायी सङ्घ, मोरङ अटोमोबाइल डिलर्स एशोसिएशन लगायतलाई वस्तुगत सङ्घहरुलाई सङ्घमा आमन्त्रण गरी छलफल गर्नुभएको छ ।
छलफलमा मोरङ व्यपार सङ्घका अध्यक्ष मुन्दडा, सङ्घका निर्वतमान अध्यक्ष पवनकुमार सारडा, वरिष्ठ उपाध्यक्ष नविन रिजाल, वाणिज्य उपाध्यक्ष विकासकुमार वेगवानी, महासचिव अनिलकुमार साह, कार्यकारिणी सदस्यहरु सुशील सुराना, सञ्जयकुमार श्रेष्ठ र सन्तनु रेग्मीले छलफलमा आआफ्नो धारणा राखेका थिए ।
