३ असार, सुर्खेत ।
सुर्खेतमा झुण्डिएर मृत अवस्थामा भेटिएकी एक युवतीमा कोरोना संक्रमण पुष्टि भएको छ । असार १ गते घर नजिकै झुण्डिएर आत्महत्या गरेकी सिम्ता गाउँपालिका(-८ कि २५ वर्षीय युवतीमा कोरोना पुष्टि भएको हो ।
उनको शव पोस्टमार्टमका लागि मेहलकुना अस्पताल लगिएको थियो । कर्णाली सामाजिक विकास मन्त्रालयको स्वास्थ्य सेवा महाशाखाका प्रमुख डा. लक्ष्मीनारायण तिवारीका अनुसार पोष्टमार्टम गर्नुअघि कोरोना परीक्षण गर्दा बुधबार संक्रमण पुष्टि भएको हो ।
युवती गत जेठ १२ गते श्रीमान र तीन वर्षकी छोरीसहित भारतबाट आएर सिम्ताकै एक क्वारेन्टिनमा १४ दिन बसेर घर फर्किएकी थिइन् । क्वारेन्टिनबाट घर जाने क्रममा आरडीटी विधिबाट कोरोना एन्टीबडी जाँच गर्दा रिपोर्ट नेगेटिभ आएको जिल्ला जनस्वास्थ्य कार्यालय प्रमुख चेतननिधि वाग्लेले जानकारी दिए । त्यसपछि उनलाई होम क्वारेन्टिनमा बस्ने गरी पठाइएको थियो ।
यो कर्णालीमा मृत्युपछि कोरोना संक्रमण पुष्टि हुनेको संख्या ४ पुगेको छ । मेहलकुना अस्पतालमा रहेको उनको शव व्यवस्थापन नेपाली सेनाले गर्नेछ ।
