३ साउन, हेटौंडा ।
वाग्मती प्रदेश सरकारले सिन्धुपाल्चोक जिल्लामा बाढीपहिरोका कारण पूर्णरुपमा क्षति भएका घरहरु निर्माण गरिदिने भएको छ ।
शुक्रबार साँझ बसेको वाग्गमती प्रदेश विपद् व्यवस्थापन निर्देशक समितिको बैठकले स्थानीय तहले उपलब्ध गराउने जग्गामा प्रदेश सरकारले पीडितहरुका लागि घर निर्माण गरिदिने निर्णय गरेको हो ।
‘स्थानीय तहबाट प्रक्रियागत रुपमा क्षतिको संकलन हुनेछ । हामी आवश्यकताका आधारमा स्थानीय तहसँग समन्वय गरेर घर निर्माण गरिदिने छौं,’ समितिका अध्यक्षसमेत रहेका मुख्यमन्त्री डोरमणि पौडेलले भने ।
मुख्यमन्त्री पौडेलको अध्यक्षतामा बसेको बैठकले सिन्धुपाल्चोकका बाढीपहिरो पीडितहरुलाई तत्काल राहत पनि उपलब्ध गराउने निर्णय भएको छ । ‘क्षतिको अवस्था हेरी तत्काल स्थानीय तहमार्फत् राहत उपलब्ध गराउन लागेका छौं ।
समितिले बाह्रबिसे नगरपालिकामा ३० लाख, भोटेकोसी गाउँपालिकामा १५ लाख र जुगल गाउँपालिकामा १० लाख राहत रकम उपलब्ध गराउने निर्णय गरेका छौं,’ मुख्यमन्त्री डोरमणि पौडेलले भने ।
प्रदेश सरकारले राहतका लागि तत्काल उपलब्ध गराउने रकमबाट स्थानीय तहले कार्यबिधिअनुसार राहत, घाइतेको उपचार, पुनःस्थापनालगायतका काम गर्न सक्ने मुख्यमन्त्री पौडेलले बताए ।
यसअघि प्रदेश सरकारले निर्णय गरेको मृतकका परिवारलाई राहत रकम एक लाख रुपैयाँ पनि तत्काल उपलब्ध गराइने समितिले जनाएको छ । आइतबारसम्म राहत रकम स्थानीय तहमा पठाइने गरी प्रक्रिया अगाडि बढाइएको आन्तरिक मामिला तथा कानुन मन्त्री शालिकराम जम्मकट्टेलले जानकारी दिए ।
समितिको बैठकले समितिमा तीन जना प्रदेशसभा सदस्यलाई मनोनित गरिएको छ । समितिका सदस्यहरुमा राजेन्द्रमान श्रेष्ठ, छिरिङ दोर्जे लामा र इन्द्रमाया गुरुङलाई मनोनित गरिएको मन्त्री जम्कट्टेलले जानकारी दिए ।
बैठकमा उद्योग, पर्यटन, वन तथा वातावरण मन्त्री अरुण नेपाल, भूमि व्यवस्था, कृषि तथा सहकारी मन्त्री दावा दोर्जे लामा, प्रमुख प्रतिपक्षी दल नेपाली कांग्रेसका नेता इन्द्र बानियाँ तथा मन्त्रालयका सचिवहरुको सहभागिता रहेको थियो ।
