१० साउन, काठमाडौँ ।
निर्मला पन्तको बलात्कारपछि हत्या भएको दुई वर्ष पुगेको छ । तर, अझै यो हत्याको गाठो फुकेको छैन । घटनामा २ वर्षसम्म प्रहरीले अनुसन्धान जारी राखे पनि हात लाग्यो शुन्नामात्र भएको छ । निर्मलाका हत्यारा पत्ता लगाउन सडकदेखि सदनसम्म आवाज उठ्यो । कयौं छानबिन समिति गठन गरेर अनुसन्धान भए तर दुई वर्षसम्म घटना रहस्यको गर्भबाट बाहिर आउन सकेको छैन ।
प्रहरीले सिआइबीसमेत गरी विभिन्न छानबिन समिति बनाएर अनुसन्धान गरे पनि हत्यारा को हो भन्न टुंगो लगाउन अझै सकेको छैन । तत्कालीन आईजीपी सर्वेन्द्र खनालको पालामा यो घटना भएको थियो । यो घटना सुल्झाउनेभन्दा गिजोल्ने काम बढी भएको आरोप खनालले खेप्नु परेको थियो ।
उनीपछि प्रहरी नेतृत्वमा आएका ठाकुरप्रसाद ज्ञवालीले आईजीपी नियुक्त भएलगत्तै आफ्नो कार्यकालमा निर्मला पन्त हत्या अनुसन्धान टुंगोमा पु¥याउने बताएका थिए । ज्ञवाली सीआईबीमै एसएसपी हुँदा कञ्चनपुर पुगेर घटनाको अनुसन्धान पनि गरेका थिए । तर, उनले प्रहरीको नेतृत्व सम्हालेको वेला अनुसन्धानमा उल्लेख्य प्रगति भएन ।प्रहरीले निर्मलाको सुरुवाल पखालेको, लुगा जलाएर नष्ट गरेको, घटनास्थल सिल नगरी प्रमाण नष्ट हुन दिएको, फिंगर र फुट प्रिन्ट संकलन नगरेको, तालिमप्राप्त कुकुर परिचालन नगरेका कारण दोषी पत्ता लगाउने बलियो प्रमाण बाँकी छैन ।
एकमात्र आधार मानिएको निर्मलाको भेजिनल स्वाब पनि त्रुटिपूर्ण रहेको भनिएपछि दोषी पत्ता लगाउने ठोस प्रमाण खोज्न जटिल छ । शुरुमा स्थानीय दिलीप बिष्टलाई प्रहरीले निर्मला हत्याको आरोपी भन्दै पक्राउ गरेको थियो । दिलीपलाई फसाउन खोजेको भन्दै स्थानीयले आन्दोलन चर्काउँदा गोली चलेर एकजनाको ज्यान गएको थियो । डिएनए नमिलेपछि दिलीप रिहा भएका थिए । पछि उनै दिलीप दोषी भन्दै दुर्गादेबीले गत भदौमा किटानी उजुरी दिएकी थिइन् । तर बलियो प्रमाण नभएकाले प्रहरीले मानसिक सन्तुलन गुमाएका भनिएका दिलीपलाई दोस्रोपटक पक्राउ गर्न सकेको छैन ।
प्रहरीकै शाख धुमिल पारेको यो घटना अनुसन्धानका लागि नवनियुक्त प्रहरी महानिरीक्षक (आईजीपी) शैलेश थापा क्षेत्रीले चासो देखाएका छन् । यो घटनालाई आफ्नो प्राथमिकतामा राख्दै आईजीपी क्षेत्रीले प्रहरीको केन्द्रीय अनुसन्धान ब्यूरो (सीआईबी) प्रमुख डीआईजी सहकुल थापा र सुदूरपश्चिम प्रदेश प्रहरी प्रमुख, डीआईजी उत्तमराज सुवेदीलाई निर्देशन दिएका छन् । आईजीपीको निर्देशनसँगै सीआईबीले अनुसन्धानमा पोख्त विशेष टोलीलाई कञ्चनपुर पठाउने तयारी गरिरहेको डीआईजी थापा बताउँछन् । दुई प्रहरी महानिरीक्षकले पार लगाउन नसकेको दुई वर्ष पूरानो निर्मला बलात्कार तथा हत्या घटनाले नवनियुक्त आइजीपीबाट आशा गरेको छ । निर्मलाको आमाबुवासंगै निर्मलालाई न्याय दिलाउन सडकमा उत्रिएका हजारौंको आँखा र विश्वास महानिरिक्षक थापामाथि अडिएको छ ।
