१२ साउन, धरान ।
सुनसरीको धरान उपमहानगरपालिका–३ स्थित पालिका तरकारी बजारमा विद्युत् सर्ट भएर आगलागी भएको छ ।
आगलागीबाट ११ जनाको फलफूल तरकारी तथा कस्मेटिक पसल, किराना पसल, होटल, जल्दा झण्डै ५२ लाख ६८ हजार रुपैयाँ बराबरको क्षति भएको प्रहरीले जनाएको छ ।
धरानस्थित इलाका प्रहरी कार्यालयका प्रहरी नायब उपरीक्षक ज्ञानेन्द्र बस्नेतले ११ जनाको पसल जलेर पूर्ण रुपमा नष्ट जानकारी दिए । बिहान साढे ४ बजेतिर रमा चौहान खतिवडाको कस्मेटिक पसलबाट विद्युत् सर्ट भई आगलागी सुरु भएको बताइएको छ ।
आगलागीबाट रमा चौहान खतिवडाको ९ लाख, कल्पना तामाङको १० लाख, ओसिन श्रेष्ठको ७ लाख, सविता खनाल लिम्बूको ६ लाख, ज्ञानकुमार श्रेष्ठको ७ लाख, अनिता आचार्जुको ७ लाख, निरा निरौलाको २ लाख, इन्दिरा श्रेष्ठको ४ लाख रुपैयाँ बराबरको धनमाल क्षति भएको प्रारम्भिक विवरण प्राप्त भएको प्रहरी नायब उपरीक्षक बस्नेतले बताए ।
पालिका तरकारी बजार क्षेत्रका सबै पसलेहरुले आइतबार बेलुका आठ बजे पसल बन्द गरी घर गएका थिए । टिनको छाना भए पनि बाँस, प्लास्टिक प्रयोग गरिएको छाप्री भएकाले सहजै आगलागी फैलिएको थियो ।
स्थानीय समुहदाय धरान उपमहानगरपालिकाको दमकल, नगर प्रहरी र जनपद प्रहरीलाई आगो नियन्त्रण गर्न करिब एक घण्टा लागेको थियो ।
